आजदेखि यी केन्द्रबाट लगाउन सकिनेछ चिनियाँ खोपको पहिलो मात्रा

काठमाडौं । चिनियाँ खोप भेरोसेलको पहिलो मात्रा लगाउनका लागि आज (आइतबार) तीन खोप केन्द्र तय गरिएको छ । जिल्ला स्वास्थ्य कार्यालय, काठमाडौंले आज निजामति अस्पताल मिनभवन, सशस्त्र प्रहरी अस्पताल बलम्बु र राष्ट्रिय आयुर्वेद अनुसन्धान तथा तालिम केन्द्र किर्तिपुरमा मात्र चिनियाँ खोप लगाइने जनाएको छ ।

तर भोलि (सोमबार) बाट भने परोपकार प्रसुति तथा स्त्रीरोग अस्पताल थापाथली, नेपाल मेडिकल कलेज अत्तरखेल, काठमाडौं मेडिकल कलेज सिनामंगल र हिमाल अस्पताल ज्ञानेश्वरमा खोप लगाउन सकिने बताइएको छ ।

त्यसैगरी, वीर अस्पताल महाबौद्ध, शुक्रराज ट्रपिकल तथा सरुवा रोग अस्पताल टेकु र त्रिवि शिक्षण अस्पताल महाराजगन्जमा कोभिसिल्ड खोपको दोस्रो मात्रा लगाउन सकिने बताइएको छ ।

सरकारले चिनसँग व्यापार गर्ने नेपाली नागरिक तथा सवारी चालक, सहचालकसँगै अन्य अत्यावश्यकीय सेवा क्षेत्रमा लागेका व्यक्तिलाई चिनियाँ खाेप दिँदै छ । त्यसैगरी प्राथमिकताका आधारमा उमेर समूह ताेकेर पनि सरकारले खाेपकाे व्यवस्था गरेकाे छ ।