ट्युनिसियामाथि ब्राजिलको फराकिलो जित

एजेन्सी । ब्राजिलले ट्युनिसियामाथि ५–१ गोल अन्तरको फराकिलो जित निकालेको छ।गए राति भएको अन्तर्राष्ट्रिय मैत्रीपूर्ण खेलमा ब्राजिललाई जिताउन रिफिन्हाले दुई गोल गरेका थिए। थप गोल रिचार्लिसन, नेयमार र पेड्रोले गरे।ट्युनिसियाका लागि मोन्टासार टाल्बीले एक गोल फर्काए। खेलको ४२ औं मिनेटमा ट्युनिसियाका डिलान ब्रोन रातो कार्ड खाँदै मैदानबाट बाहिरिएका थिए।

खेलको ११ औं मिनेटमा रिफिन्हाले गोल गर्दै ब्राजिललाई सुरूआती अग्रता दिलाए। १८ औं मिनेटमा ट्यूनिसियाका टाल्बीले गोल गर्दै खेललाई बराबरीमा ल्याए। तर लगत्तै १९ औं मिनेटमा रिचार्लिसनले गोल गर्दै ब्राजिललाई पुन अग्रता दिलाए। त्यसपछि नेइमारले २९ औं मिनेटमा पेनाल्टीमार्फत गोल गर्दै अग्रता ३(१ मा पुर्‍याए।

४० औं मिनेटमा रिफिन्हाले व्यक्तिगत दोस्रो गोल गर्दा टोलीलाई पहिलो हाफमै ४(१ ले अघि बढाए। दोस्रो हाफमा उत्कृष्ट खेल प्रदर्शन गरेको ट्युनिसियामाथि ब्राजिलले थप एक गोल गर्‍यो। खेलको ७४ औं मिनेटमा पेड्रोले गोल गर्दै ब्राजिलको फराकिलो जित पक्का गरे।