बलिउड अभिनेत्री नोरा फतेहीले कतार विश्वकपमा प्रस्तुति दिने

काठमाडौँ । नोरा फतेही पछिल्लो समय निकै रुचाइएकी बलिउड अभिनेत्री हुन् । अभिनयसँगै उनको नृत्यको चर्चा हुने गर्छ । नोरालाई लिएर नयाँ खबर छ । पिंकभिल्लाका अनुसार कतारमा हुन लागेको फिफा विश्वकप फुटबल २०२२ मा उनले प्रस्तुति दिने भएकी छन् । यसअघि जेनिफर लोपेज र सकिराजस्ता विश्व सेलिव्रिटीले पनि विश्वकपमा प्रस्तुति दिइसकेका छन् ।

यसवर्षको फिफाको आधिकारिक गीतको म्युजिक भिडियोमा पनि नोरालाई दैख्न सकिनेछ । सकिराको वाका वाका र लाला लालाजस्ता चर्चित फिफाका गीतमा काम गरिसकेको रेडवान स्टुडियोले गीत निर्माण गर्दैछ । म्युजिक भिडियो मात्र नभएर समापन समारोहमा समेत नोराले प्रस्तुति दिने भएकी छन् । साथै हिन्दीमा गीत पनि गाउनेछिन् ।

विश्वकै ठूलो खेल मानिने उक्त समारोहमा प्रस्तुति दिने भएपछि नोराका प्रशंसक खुशि भएका छन् । विश्वकप फुटबल मंसिर ४ गतेदेखि कतारमा सुरु हुँदैछ । नोरा भने यतिबेला टिभी रियालिटी शो ‘झलक दिखालाजा’मा काम गरिरहेकी छन् भने केही फिल्मको डान्समा देखिनेछिन् ।