काठमाडौँ । विद्युतीय कार निर्माता कम्पनी टेस्लाले चीनमा निर्मित कार विक्रीमा नयाँ रेकर्ड राखेको छ । चीनको सांघाईस्थित फ्याक्ट्री अपग्रेडपछि टेस्लाले कार विक्रीमा नयाँ रेकर्ड बनाएको हो । चाइना प्यासेन्जर कार एसोसिएसनका अनुसार टेस्लाले सेप्टेम्बरमा चीनमा निर्मित ८३ हजार १३५ कारहरु डेलिभरी गरेको छ । यो चीनमा निर्मित मासिक कार विक्रीमा अहिलेसम्मकै उच्च हो ।

यस अघि टेस्लाले एक महिनामा सबैभन्दा धेरै जुनमा ७८ हजार ९०६ कार डेलिभरी गरेको थियो । टेस्लाले सन् २०२२ को अगष्टको तुलनामा सेप्टेम्बरमा ८ प्रतिशतधेरै कार डेलिभरी गर्दै नयाँ रेकर्ड बनाएको हो ।

टेस्लाले डिसेम्बर २०१९ देखि सांघाई फ्याक्ट्रीबाट कार उत्पादन सुरु गरेको थियो । त्यसयता एक महिनामा यति धेरै कार डेलिभरी गरेको यो पहिलो पटक हो । गत जुलाइमा शाङ्घाई प्लान्टमा अपग्रेडको लागि अधिकांश उत्पादन स्थगन गरेपछि डेलिभरी छिटो भएको टेस्लाले जनाएको छ ।

कार विक्रीमा नयाँ रेकर्ड राखेसँगै टेस्लाले विद्युतीय सवारीसाधनमा बढ्दो आकर्षण रहेको बताएको छ । ‘चीनमा निर्मित टेस्ला कारको कीर्तिमानी उच्च विक्रीले विद्युतीय सवारीसाधनले गतिशीलताको प्रवृतिको नेतृत्व गरिरहेको देखाएको छ,’ टेस्लाले विज्ञप्तिमा भनेको छ ।

टेस्लाले गत हप्ता सार्वजनिक गरेको तथ्यांक अनुसार तेस्रो त्रैमासिकमा विश्वव्यापी रुपमा ३ लाख ४३ हजार ८३० कार डेलिभरी गरेको छ । जुन विश्वको सबैभन्दा मूल्यवान अटोमेकरको लागि नयाँ रेकर्ड भएको टेस्लाको भनाइ छ ।