विशिष्ट व्यक्तिहरूको सुरक्षा व्यवस्थापन कार्यविधि परिमार्जन गरिँदै

काठमाडौं । सरकारले विशिष्ट व्यक्तिहरूको सुरक्षा व्यवस्थापन कार्यविधि परिमार्जन गर्ने भएको छ । गत शुक्रबार राष्ट्रपति विद्यादेवी भण्डारीको सवारीका क्रममा प्रहरीले चिकित्सकलाई लाठी चार्ज गरेपछि भिआइपीको सुरक्षालाई लिएर जनस्तरबाट चर्को विवाद भएको थियो । प्रहरीले चिकित्सकमाथि लाठी चार्ज गरेको भन्दै नेपाल चिकित्सक संघले आपतकालीन बाहेकका सबै सेवा बन्द गर्ने निर्णय गरेको थियो ।

आज (आइतबार) प्रधानमन्त्रीको कार्यालयमा सरकारका पदाधिकारी र चिकित्सक संघका पदाधिकारीबीच भएको वार्तामा विभिन्न छ बुँदे सहमति भएको छ । यो सँगै चिकित्सक संघले आफ्नो आन्दोलन फिर्ता लिएको छ । दुई पक्षबीच भएको सहमतिमा विशिष्ट व्यक्तिको सवारीमा बिरामी एवं आमनागरिक र विशेषगरी स्वास्थ्य संस्था, विद्यालयलगायतका संवेदनशील संस्था तथा क्षेत्रहरूमा असहजता नहुने गरी व्यवस्थापन गर्ने उल्लेख गरिएको छ ।

‘विशिष्ट व्यक्तिको सवारीमा सुरक्षा व्यवस्थापन गर्दा बिरामी एवं आमनागरिक र विशेषगरी स्वास्थ्य संस्था, विद्यालयलगायतका संवेदनशील संस्था तथा क्षेत्रहरूमा असहजता नहुने गरी “विशिष्ट व्यक्तिहरूको सुरक्षा व्यवस्थापन कार्यविधि, २०७७” मा गर्नुपर्ने परिमार्जनसम्बन्धमा नेपाल सरकारसमक्ष एक हप्ता भित्रमा सुझाव पेश गर्ने। नेपाल सरकारले उक्त सुझावहरूलाई यथाशीघ्र कार्यान्वयनमा लैजाने,’ सहमतिमा भनिएको छ ।