आईपीएल : विराट कोहलीले अमित मिश्रालाई गरे गाली, जुनियर खेलाडीलाई देखाए जुत्ता

एजेन्सी । आईपीएल २०२३ को ४३ औँ खेलमा निकै हंगामा भयो । लखनऊ सुपर जाइन्ट्स र रोयल च्यालेन्जर्स बैंगलोरबीचको एकना स्टेडियममा भएको खेलमा विराट कोहलीले विपक्षी टोलीका खेलाडी अमित मिश्रा र नवीन उल हकपछि लखनऊ सुपर जाइन्ट्सका प्रशिक्षक गौतम गम्भीरसँग भिड्दै गरेको देखियो ।

कोहलीले मैदानमा जुनियर खेलाडी नवीन उल हक र सिनियर क्रिकेटर अमित मिश्रालाई गाली गरेको सामाजिक सञ्जालमा बताइएको छ । विराट यहीँ रोकिएनन्, उनले नवीन उल हकलाई जुत्ता पनि देखाए । कोहलीले किन यसो गरे, अहिलेसम्म खुल्न सकेको छैन ।

सामाजिक सञ्जालमा भाइरल भएका धेरै भिडियोमा यो कुरा विराट कोहलीबाट सुरु भएको स्पष्ट देख्न सकिन्छ । लखनउको इनिङ्सको १७ औं ओभरको सुरुमा विराट अचानक स्टम्पको नजिक दौडिए र क्रिजमा रहेका नवीन उल हकलाई केही भने ।

यसपछि अफगानी तेज बलर नविन पनि विराटको नजिक पुगे र दुबैले तू तू मैं मैं भन्न थाले । यसै क्रममा विराटले आफ्नो जुत्तातर्फ इशारा गर्दै त्यसबाट माटो निकालेर नवीनलाई केही भने । उसले अफगान खेलाडीको हैसियतको कुरा गरिरहेको जस्तो देखिन्थ्यो ।

यसपछि विकेटकिपर दिनेश कार्तिक र अम्पायरले विराट र नवीनलाई अलग गरे । कुरा बढ्दै गएको देखेर नन स्ट्राइक एन्डमा उभिएका अमित मिश्राले विराटलाई शान्त पार्ने प्रयास गरे तर कोहलीले टीम इन्डियाका सिनियर पार्टनर अमित मिश्रालाई पनि छोडेनन् । उनी पनि मिश्रसँग झगडा गर्न थाले ।

खेलपछि जब दुवै खेलाडीले हात मिलाउने पालो आयो, तब कोहली फेरि नवीनसँग झगडा गरेको देखियो । नवीनले कोहलीसँग हात मिलाए तर उनको हात झटकाए । सामाजिक सञ्जालमा कोहलीको यो अभिनय देखेर मानिसहरुले नकारात्मक प्रतिक्रियाहरु दिइरहेका छन् ।