काठमाडौं । मिडिया स्पेस सोलुसन्स प्रालि र फ्युचरएक्स ट्रेड फेयर एन्ड इभेन्ट्स प्रालिको संयुक्त आयोजनामा भएको नेपाल बिल्डकन अन्तर्राष्ट्रिय प्रदर्शनीको १० औं संस्करण भव्यताका साथ सम्पन्न भएको छ ।

फागुन ८ गतेदेखि काठमाडौंको भृकुटीमण्डपमा सञ्चालन भएको उक्त प्रदर्शनीमा विभिन्न देशका ३ सयभन्दा बढी कम्पनीका १५० बढी स्टलहरू रहेका थिए । प्रदर्शनीमा निर्माण सम्बन्धी उद्योग, कम्पनी, डिलर तथा सब-डिलरहरू र बिक्रेताहरूले निर्माण व्यवसायसँग सम्बन्धित उत्पादनहरूको जानकारी गराएका थिए ।

प्रदर्शनीमा समेटिएका सामग्रीहरू
प्रदर्शनीमा कन्स्ट्रक्शन मेटेरियल्स, कन्स्ट्रक्शन मेसिनरी, प्रिफ्याब स्ट्रक्चर, युपिभिसी विन्डोज मेसिनरी, युपिभिसी प्रोफाइल, डोर्स एण्ड विन्डोज, आर्किटेक्चर हार्डवेयर, बाथरुम फिटिङ्स, पाइप, टायल्स एण्ड स्यानिटरी वेयर, रुफिङ, प्रि-इन्जिनियरिङ बिल्डिङ, पावर टुल्स, विन्डोज लगायतका सामग्रीहरू प्रदर्शनीमा राखिएका थिए ।

यति पार्क्वेट एण्ड फर्निचर प्रालि लिमिटेडको सहभागिता
यस प्रदर्शनीमा यति पार्क्वेट एण्ड फर्निचर प्रालि लिमिटेडले आफ्ना उत्पादनहरू प्रदर्शन गरेको थियो । कम्पनीले काठका उत्पादनहरूको परम्परागत अवधारणालाई नवीनतम प्रविधिसँग जोड्दै उत्कृष्ट डिजाइन प्रस्तुत गर्यो ।

घर, कार्यालय, सेमिनार हल तथा बैठक हलका लागि विशेष डिजाइनहरू उपलब्ध गराउँदै आएको यति पार्क्वेटले पर्यावरणमैत्री उत्पादनहरू निर्माण गरिरहेको छ । पार्क्वेट फ्लोरिङ प्राकृतिक रूपमा सिजन गरिएको काठबाट उत्पादन गरिन्छ जसमा साज, शेषम, सागौन, पाइन र युकेलिप्टस प्रयोग गरिन्छ ।

गोल्छा अर्गनाइजेसनको सहभागिता
यस प्रदर्शनीमा गोल्छा अर्गनाइजेसनको सामग्री पनि प्रदर्शन गरिएको थियो । ‘हुलास’ ब्रान्ड अन्तर्गत गोल्छा अर्गनाइजेसनले छानाका पानाहरू, एलुमिनियम, पोलहरू, संरचनाहरू, ग्याल्भेनाइज्ड तथा कालो ट्यूबहरू प्रदर्शन गरेको थियो ।

सन् १९८१ मा नेपाल र सिंगापुरको कमक्राफ्ट लिमिटेडबीचको संयुक्त उद्यमको रूपमा स्थापना भएको हुलास स्टीलले वातावरणमैत्री उत्पादनमार्फत दिगो विकासको लक्ष्य लिएको छ ।

नेपाल सेरामिक उद्योगको सहभागिता
नेपाल सेरामिक उद्योग प्रालि नेपालको पहिलो टाइल उत्पादन गर्ने कम्पनी हो । बारा जिल्लाको जीतपुर उपमहानगरपालिकामा रहेको यस उद्योगले किफायती मूल्यमा अन्तर्राष्ट्रिय स्तरका टाइल उत्पादन गर्दै आएको छ ।

अत्याधुनिक प्रविधिको प्रयोग गरी ग्राहकहरूको आवश्यकता अनुरूप नयाँ डिजाइन तथा आकर्षक सामग्री उत्पादनमा केन्द्रित रहेको नेपाल सेरामिक उद्योगले यस प्रदर्शनीमा आफ्नो उत्पादनहरू प्रस्तुत गरेको थियो ।

इन्टर-टेक समूहको सहभागिता
इन्टर-टेक समूहअन्तर्गत इन्टर-टेक प्रा.लि. सन् २०३५ सालमा स्थापना भएको थियो । यो बुटवल औद्योगिक क्षेत्रकै पहिलो उद्योग तथा रूपन्देही जिल्लाको पहिलो प्रालि कम्पनी हो ।

प्रारम्भमा हाइड्रोपावर टर्बाइन, सोलार ड्रायर, सोलार वाटर हिटर निर्माणबाट आफ्नो यात्रा सुरू गरेको इन्टर-टेक प्रालिले क्रमशः झोलुङ्गे पुलका पार्टस्, आयल ट्यांक, टावर, स्टिल फेब्रिकेशन लगायतका कार्यमा आफ्नो दक्षता प्रस्तुत गरिरहेको छ ।

नयाँ प्रविधिको प्रयोग गर्दै अन्तर्राष्ट्रिय गुणस्तरका उत्पादन प्रतिस्पर्धी मूल्यमा ग्राहकहरूलाई उपलब्ध गराउने इन्टर-टेक समूहको लक्ष्य रहेको छ । नेपाल बिल्डकन अन्तर्राष्ट्रिय प्रदर्शनी नेपाली निर्माण व्यवसायका लागि नवीनतम प्रविधि, उत्पादन तथा सेवाहरूको प्रवर्द्धन गर्ने एक महत्वपूर्ण मञ्च बनेको छ ।