काठमाडौं । श्रम, रोजगार तथा सामाजिक सुरक्षा मन्त्रालय अन्तर्गत वैदेशिक रोजगार विभागको ई.पि.एस. कोरिया शाखाले सन् २०२५ का लागि प्रथम चरणको कोरियन भाषा परीक्षाका लागि आवेदन खुला गरेको छ ।

दक्षिण कोरियामा रोजगारीको अवसर खोजिरहेका नेपाली नागरिकहरूका लागि यो परीक्षा महत्वपूर्ण मानिन्छ । ई.पि.एस. शाखाका अनुसार परीक्षा आवेदन फाराम साउन २६ गतेदेखि ३१ गतेसम्म अनलाइनमार्फत भर्न सकिनेछ ।

इच्छुक उम्मेदवारले  https://eoers.epsnepal.gov.np वेबसाइटमा गई आवेदन दिनुपर्नेछ । परीक्षाका लागि आवेदन शुल्क २८ अमेरिकी डलर तोकिएको छ । यो परीक्षाबाट उत्पादनमूलक क्षेत्रमा ३,५०० जना र कृषि तथा पशुपालन क्षेत्रमा १,८०० जना गरी कुल ५,३०० जना नेपाली नागरिक छनोट गरिने सूचनामा उल्लेख गरिएको छ ।

ई।पि।एस। प्रणाली अन्तर्गत कोरियामा नेपाली श्रमिक पठाउने प्रक्रिया अनुसार लिइने यो परीक्षा HRD Service of Korea को समन्वयमा सञ्चालन गरिनेछ । ई.पि.एस. शाखाले इच्छुक तथा योग्य नेपाली नागरिकलाई निर्धारित म्यादभित्र अनलाइन आवेदन दिन आग्रह गरेको छ । परीक्षा सम्बन्धी थप जानकारी अर्को सूचनामार्फत सार्वजनिक गरिने जनाएको छ ।