अपि पावरले मर्स्याङ्दी बेसी जलविद्युत् आयोजना अधिग्रहण, उत्पादन क्षमता ११२ मेगावाट पुग्ने

काठमाडौं । सर्वसाधारणको लगानी रहेको अपि पावर कम्पनी लिमिटेडले लमजुङमा अवस्थित दिव्य ज्योति हाइड्रोपावरले प्रवर्द्धन गर्दै आएको ५० मेगावाट क्षमताको मर्स्याङ्दी बेसी जलविद्युत् आयोजना अधिग्रहण गर्ने निर्णय गरेको छ। मंगलबार बसेको सञ्चालक समितिको बैठकले आयोजना आर्थिक र प्राविधिक दृष्टिले सम्भाव्य देखिएकाले दिव्य ज्योति हाइड्रोपावरको सम्पूर्ण सेयर खरिद गर्ने र पूर्ण स्वामित्वमा सञ्चालन गर्ने निर्णय गरेको हो।

हाल कम्पनी जलविद्युत् र सौर्य ऊर्जा क्षेत्रमा आधा दर्जन आयोजना सञ्चालन गर्दै ६२.५ मेगावाट विद्युत् उत्पादन गर्दै आएको छ। अपि पावरको मातहतमा ४० मेगावाट माथिल्लो चमेलिया, ८.५ मेगावाट नौगाड, ८ मेगावाट अपर नौगाड, ४ मेगावाट चन्द्रपुर सोलार, १–१ मेगावाट ढल्केबर र सिमरा सोलार परियोजना छन्। मर्स्याङ्दी बेसी आयोजना सम्पन्न भएपछि कम्पनीको कुल उत्पादन क्षमता ११२ मेगावाट पुग्नेछ।

गत आर्थिक वर्षको चैतसम्म अपिले ३५ करोड ३४ लाख रुपैयाँ खुद नाफा आर्जन गरेको छ। कम्पनीले नौ महिनामा १ अर्ब १९ करोड रुपैयाँ बराबरको बिजुली नेपाल विद्युत् प्राधिकरणलाई बिक्री गरेको छ। कम्पनीको प्रतिशेयर आम्दानी ७.७६ रुपैयाँ, नेटवर्थ १०९ रुपैयाँ र चुक्ता पुँजी ६ अर्ब ६७ करोड रुपैयाँ रहेको छ।