सिन्धुपाल्चोकमा १०२ मेगावाटको मध्य–भोटेकोसी जलविद्युत् आयोजनाको उत्पादन परीक्षण सफल

काठमाडौं । सिन्धुपाल्चोकमा निर्माण सम्पन्न १०२ मेगावाट क्षमताको मध्य–भोटेकोसी जलविद्युत् आयोजनाको उत्पादन परीक्षण सफल भएको छ। नेपाल विद्युत् प्राधिकरणको सहायक कम्पनी चिलिमे जलविद्युत् कम्पनी लिमिटेडको अगुवाइमा बनेको आयोजनाको पहिलो ३४ मेगावाटको युनिट सोमबारदेखि राष्ट्रिय प्रसारण प्रणालीमा जडान गरी परीक्षण गरिएको हो।

कम्पनीका अनुसार पहिलो युनिट परीक्षण सफल भएपछि दोस्रो र तेस्रो युनिट पनि क्रमशः परीक्षण उत्पादनमा ल्याइनेछ। सबै युनिटको परीक्षण सफल भए असोजको पहिलो सातादेखि १५ दिनका लागि पूर्ण क्षमतामा परीक्षण उत्पादन गरिने र त्यसपछि असोज दोस्रो सातादेखि व्यावसायिक उत्पादन सुरु हुने तयारी छ।

आयोजनाबाट उत्पादित विद्युत् खिम्ती–बाह्रबिसे प्रसारण लाइनमार्फत बाह्रबिसे–३ पतालिमा रहेको सबस्टेसनमा जडान गरी राष्ट्रिय ग्रिडमा प्रवाह गरिएको हो।

मध्य–भोटेकोसी आयोजनाको निर्माण कार्य २०७० सालमा सुरु भएको थियो। २०७३ सालमै सम्पन्न गर्ने लक्ष्य राखिए पनि २०७२ सालको भूकम्प, सोही वर्षको नाकाबन्दी, बाढी–पहिरो लगायतका कारणले निर्माण कार्यमा लामो ढिलाइ भएको थियो।