पर्सा । वीरगञ्ज नाका हुँदै चालु आर्थिक वर्षको पहिलो तीन महिनामा दुई खर्ब १८ अर्ब १० करोड रुपैयाँ मूल्य बराबरका वस्तु तथा सामान आयात भएको छ । गत आर्थिक वर्षको सोही अवधिसँग तुलना गर्दा चालु वर्षमा ३४ अर्ब २३ करोड रुपैयाँ बढी मूल्यको सामान वीरगञ्ज भन्सारमार्फत भित्रिएको भन्सार कार्यालयले जनाएको छ ।
वीरगञ्ज भन्सार कार्यालयका प्रमुख भन्सार प्रशासक विष्णुप्रसाद ज्ञवालीका अनुसार, चालु आवको असोजसम्मको तीन महिनामा वीरगञ्ज नाका हुँदै दुई खर्ब १८ अर्ब १० करोड मूल्य बराबरका वस्तु भित्रिँदा ५८ अर्ब २३ करोड रुपैयाँ राजस्व सङ्कलन भएको छ ।
गत आवको सोही अवधिमा १ खर्ब ८३ अर्ब ८७ करोड मूल्य बराबरका सामान आयात भएका थिए । भन्सार कार्यालयका अनुसार, चालु आवको तीन महिनामा आयात मात्रै बढेको छैन, निर्याततर्फ पनि उल्लेखनीय वृद्धि भएको छ । वीरगञ्ज नाका हुँदै चालु आवको तीन महिनामा २६ अर्ब ५८ करोड मूल्यबराबरका वस्तु तथा सामान विदेश निर्यात भएका छन् ।
गत आवको सोही अवधिमा आठ अर्ब ८४ करोड मूल्य बराबरको सामान निर्यात भएको थियो । यस अनुसार चालु आवको पहिलो तीन महिनामा निर्यातमा १७ अर्ब ७५ करोड रुपैयाँको उल्लेखनीय वृद्धि देखिएको छ । यो तथ्यांकले वीरगञ्ज नाकाबाट देशको वैदेशिक व्यापारमा तीव्र बृद्धि भइरहेको संकेत गर्दछ ।
