काठमाडौँ । चालु आर्थिक वर्ष २०८२/८३ को पहिलो त्रैमाससम्म राष्ट्रिय स्तरका विकास बैंकको नाफा प्रभावित भएको छ। सार्वजनिक वित्तीय विवरण अनुसार बैंकहरूको कुल नाफा ४५.२० प्रतिशतले घटेर ७८ करोड ३४ लाख ५४ हजार रुपैयाँमा सीमित भएको छ।
गत आवको सोही अवधिमा यी बैंकहरूले १ अर्ब ४२ करोड ९५ लाख ४७ हजार रुपैयाँ नाफा आर्जन गरेका थिए। यस अवधिमा ४ बैंकको नाफा घटेको देखिएको छ भने ३ कम्पनीको नाफामा सुधार आएको छ। लुम्बिनी विकास बैंकको नाफा भने ऋणात्मक रहेको छ।
सर्वाधिक नाफा आर्जन गर्नेमा गरिमा विकास बैंक रहेको छ। बैंकले तीन महिनामा आफ्नो नाफा ११ प्रतिशतले बढाएर २५ करोड ५ लाख ७५ हजार रुपैयाँ पुराएको छ। मुक्तिनाथ विकास बैंक दोस्रो नम्बरमा भएपनि यसको नाफा २०.२४ प्रतिशतले घटेर २२ करोड ४७ लाख ७४ हजार रुपैयाँमा सीमित भएको छ।
शाइन रेसुङ्गा डेभलपमेन्ट बैंकको नाफा १५.१७ प्रतिशतले घटेर २० करोड ३० लाख रुपैयाँ पुगेको छ भने कामना सेवा विकास बैंकको नाफा १२.९२ प्रतिशतले बढेर १९ करोड ७५ लाख रुपैयाँमा पुगेको छ। महालक्ष्मी विकास बैंकको नाफा ३.४२ प्रतिशतले बढेर ९ करोड ७५ लाख रुपैयाँ पुगेको छ।
सर्वाधिक नाफा वृद्धि गर्ने बैंकमा सांग्रिला डेभलपमेन्ट बैंक रहेको छ। बैंकको नाफा ४६.५८ प्रतिशतले बढेर ८ करोड ८२ लाख रुपैयाँ पुगेको छ। ज्योति विकास बैंकको नाफा भने ५३ प्रतिशतले घटेर ७ करोड ३ लाख रुपैयाँमा सीमित भएको छ।
असोज मसान्तसम्म लुम्बिनी विकास बैंकको नाफा ३४ करोड ८५ लाख रुपैयाँ ऋणात्मक रहेको विवरणमा उल्लेख गरिएको छ।
