प्रभु बैंकको पनि नाफा प्रतिशत घट्यो

काठमाडौं । प्रभु बैंक लिमिटेडको नाफामा चालु आर्थिक वर्षको पहिलो त्रैमासमा उल्लेख्य गिरावट आएको छ। बैंकले सो अवधिमा ५५ करोड ८४ लाख ८३ हजार रुपैयाँ नाफा कमाएको छ, जुन गत आर्थिक वर्षको सोही अवधिको तुलनामा ४६.३३ प्रतिशतले कम हो। गत आवको पहिलो तीन महिनामा बैंकले १ अर्ब ४ करोड ६ लाख रुपैयाँ नाफा कमाएको थियो।

नाफा घटेपनि प्रभु बैंकको खुद ब्याज आम्दानीमा सुधार देखिएको छ। बैंकको खुद ब्याज आम्दानी १०.१४ प्रतिशतले बढ्दै २ अर्ब ८९ करोड ५२ लाख ७६ हजार रुपैयाँ पुगेको छ। तर सञ्चालन नाफा भने १६.५१ प्रतिशतले घटेर १ अर्ब १७ करोड २० लाख रुपैयाँमा झरेको छ।

सो अवधिमा बैंकको वितरणयोग्य नाफा ४० करोड ६० लाख रुपैयाँ पुगेको छ। बैंकको चुक्ता पुँजी २३ अर्ब ५४ करोड २४ लाख रुपैयाँ र जगेडा कोष १४ अर्ब ५५ करोड ६० लाख रुपैयाँ रहेको छ।

बैंकको खराब कर्जा (NPL) गत वर्षको ४.९४ प्रतिशतबाट बढ्दै ५.७८ प्रतिशत पुगेको छ। सोही अनुसार बैंकको प्रतिसेयर आम्दानी (EPS) ९ रुपैयाँ ४९ पैसा र प्रतिशेयर नेटवर्थ १६३ रुपैयाँ ५५ पैसा कायम भएको छ।