काठमाडौं । एभरेष्ट बैंक लिमिटेडले चालु आर्थिक वर्ष २०८२/८३ को पहिलो त्रैमास अर्थात असोज मसान्तसम्मको वित्तीय विवरण सार्वजनिक गरेको छ। प्रकाशित विवरणअनुसार बैंकले तीन महिनामा १ अर्ब १७ करोड ९२ लाख ७४ हजार रुपैयाँ नाफा आर्जन गरेको छ।

गत आर्थिक वर्षको सोही अवधिमा बैंकले १ अर्ब १२ करोड ७७ लाख ४० हजार रुपैयाँ नाफा कमाएको थियो। यसअनुसार, बैंकको नाफा ४.५७ प्रतिशतले वृद्धि भएको छ।

यो अवधिमा बैंकको खुद ब्याज आम्दानी र सञ्चालन नाफा दुवै बढेका छन्। गत आवको पहिलो त्रैमासमा २ अर्ब १३ करोड ९० लाख रुपैयाँ खुद ब्याज आम्दानी गरेको बैंकले चालु आवमा २ अर्ब ४० करोड ३८ लाख रुपैयाँ आम्दानी गरेको छ।

त्यस्तै, सञ्चालन नाफा पनि १ अर्ब ६१ करोड १६ लाख रुपैयाँबाट बढेर १ अर्ब ६८ करोड ५५ लाख रुपैयाँ पुगेको छ। असोज मसान्तसम्म बैंकको वितरणयोग्य नाफा ५ अर्ब ४९ करोड ६० लाख रुपैयाँ रहेको छ।

असोज मसान्तसम्म बैंकको खराब कर्जा अनुपात ०.७७ प्रतिशतबाट घटेर ०.७४ प्रतिशतमा आएको छ। बैंकको प्रतिसेयर आम्दानी (EPS) ३६ रुपैयाँ ४४ पैसा र प्रतिसेयर नेटवर्थ २५५ रुपैयाँ ६९ पैसा रहेको विवरणमा उल्लेख गरिएको छ।

बैंकको चुक्ता पुँजी १२ अर्ब ९४ करोड ४६ लाख ९४ हजार रुपैयाँ र जगेडा कोष १४ अर्ब ४१ करोड ८८ लाख ८३ हजार रुपैयाँ रहेको छ। यस अवधिसम्म बैंकले ३ खर्ब १३ अर्ब ८९ करोड २ लाख ७६ हजार रुपैयाँ निक्षेप संकलन गरी २ खर्ब २७ अर्ब ३४ करोड ५८ लाख १८ हजार रुपैयाँ कर्जा प्रवाह गरेको छ।