काठमाडौं । भारतका लागि पोल्याण्ड गणतन्त्रका कार्यवाहक राजदूत महामहिम डा. पियोटर आन्तोनी श्विताल्स्कीले काठमाडौंस्थित हायात सेन्ट्रिक सोल्टीमोड होटलमा आयोजित एक औपचारिक समारोहका अवसरमा मानार्थ वाणिज्यदूत जनरल लोकमान्य गोल्छालाई पोल्याण्ड गणतन्त्रको ‘अर्डर अफ मेरिट’ को अफिसर क्रस प्रदान गरिएको बताइएको छ ।

पोल्याण्ड गणतन्त्रको नेपालमा स्थायी दूतावास नरहेकाले नेपालका लागि कूटनीतिक प्रतिनिधित्व तथा वाणिज्यदूत सेवाहरू भारतको नयाँ दिल्लीस्थित पोल्याण्ड दूतावासमार्फत सञ्चालन हुँदै आएको छ। यस हैसियतमा उक्त दूतावासले नेपालमा रहेका पोलिश नागरिकहरूलाई आवश्यक सहयोग प्रदान गर्नुका साथै नेपाल–पोल्याण्डबीचको सहकार्य र आपसी सम्बन्ध प्रवर्द्धन गर्दै आएको जनाइएको छ।

यो सम्मान पोल्याण्डले विदेशी नागरिकलाई प्रदान गर्ने उच्चतम नागरिक सम्मानहरूमध्ये एक हो। विशिष्ट अतिथि तथा कूटनीतिक समुदायका सदस्यहरूको उपस्थितिमा सम्पन्न उक्त समारोहमा पोल्याण्ड गणतन्त्रको अर्डर अफ मेरिट पोल्याण्ड राज्यप्रति असाधारण सेवा पुर्याएका तथा अन्तर्राष्ट्रिय सहकार्य र आपसी समझदारीलाई उल्लेखनीय रूपमा सुदृढ बनाएका व्यक्तिहरूलाई प्रदान गरिने सम्मान भएको उल्लेख गरिएको थियो।

यसअघि सन् २०१५ मा, नेपालमा आएको विनाशकारी भूकम्पका समयमा पुर्याएको उल्लेखनीय योगदानको कदरस्वरूप पोल्याण्ड गणतन्त्रका राष्ट्रपति महामहिम आन्द्रेज दुदाद्वारा लोकमान्य गोल्छालाई नाइट्स क्रस अफ द अर्डर अफ मेरिट प्रदान गरिएको थियो।

हाल प्रदान गरिएको अफिसर क्रस अफ द अर्डर अफ मेरिट गोल्छाले कोभिड–१९ महामारीको कठिन समयमा देखाउनुभएको उत्कृष्ट नेतृत्व, साथै वर्षौंदेखि नेपालमा रहेका पोलिश नागरिकहरूलाई निरन्तर रूपमा प्रदान गर्दै आएको सहयोग, सहकार्य र सेवाको उच्च मूल्याङ्कनस्वरूप प्रदान गरिएको हो।

आफ्नो सम्बोधनमा महामहिम डा. श्विताल्स्कीले गोल्छाको दीर्घकालीन प्रतिबद्धता, नेपाल–पोल्याण्डबीचको सहकार्य प्रवर्द्धनमा पुर्याएको योगदान तथा जनस्तरको सम्बन्ध सुदृढ गर्न खेलेको भूमिकाको उच्च प्रशंसा गरे। उनले यस्ता प्रयासहरूले दुई देशबीचको मैत्रीपूर्ण सम्बन्धलाई थप गहिरो बनाएको उल्लेख गरेका छन्।

सम्मान ग्रहण गर्दै गोल्छाले यो सम्मानलाई नेपाल र पोल्याण्डबीचको साझा मूल्य, आपसी सम्मान तथा दीर्घकालीन मित्रताको प्रतीकका रूपमा व्याख्या गरे। यो विशिष्ट सम्मान मानवीय सेवा, निरन्तर प्रतिबद्धता तथा नेपाल–पोल्याण्ड सम्बन्धको सुदृढीकरणको महत्वपूर्ण प्रतीकका रूपमा रहेको बताइएको छ।