काठमाडौँ । निर्वाचन आयोगले निर्वाचनलाई स्वच्छ,निष्पक्ष र शान्तिपूर्ण बनाउन मतदाताका लागि पनि आचारसंहिता लागू गरेको छ । आयोगका अनुसार आचारसंहिता राजनीतिक दल र उम्मेदवार मात्र होइन,सर्वसाधारण मतदातामा पनि समान रुपमा लागू हुन्छ ।

आचारसंहिताअनुसार मतदान केन्द्रभित्र मोबाइल,क्यामरा तथा प्रज्वलनशील पदार्थ लैजान पाइँदैन र मादक पदार्थ सेवन गरेर मतदान गर्न जान निषेध छ । दल वा उम्मेदवारको चुनाव चिन्ह,झण्डा वा प्रचार झल्किने कपडा,ब्याज,स्टिकर लगाउन नहुने तथा शरीरमा खोपिएको ट्याटुबाट पनि त्यस्ता चिन्ह प्रदर्शन गर्न नपाइने आयोगले जनाएको छ । झुटा अफवाह फैलाउने वा सामाजिक सञ्जालमार्फत तथ्यहीन सामाग्री प्रचार गर्न पनि रोक लगाएको छ ।

मतदानका लागि मतदाता परिचयपत्र अनिवार्य हुने आयोगले जनाएको छ । उल्लघंन गरी गोपनीयता भंग गरेमा १५ हजार रुपैँयासम्म जरिवाना हुन सक्छ ।

यसैबीच आयोगले देशभरका ७५३ स्थनीय तहका ६७४३ वडामा मतदाता शिक्षा स्वयंसेवक परिचालन गरेको छ । मतदानको दिन गर्भवती,अपागं भएका व्यक्ति,ज्येष्ठ नागरिक,बिरामी,सुत्केरी तथा लैंगिक तथा यौनिक अल्पसंख्यक मतदातालाई प्राथमिकताका आधारमा मतदान गर्ने व्यवस्था गरिएको बताइएको छ ।