वीरगन्ज । चालु आर्थिक वर्षको पहिलो सात महिनामा वीरगन्ज नाका हुँदै विद्युतीय सवारीसाधनको आयातमा उल्लेख्य वृद्धि भएको छ । यस अवधिमा रु १ अर्ब ४८ करोड ६४ लाख मुल्य बराबरका ४ सय ९७ वटा विद्युतीय जिप, कार र भ्यान आयात भइकम छन् । ती सवारीबाट रु ९६ करोड ३६ लाख राजस्व सङ्कलन भएको जनाइएको छ ।
गत आर्थिक वर्षको सोही अवधिसँग तुलना गर्दा यो संख्या उल्लेखनीय रुपमा बढेको हो । अघिल्लो वर्ष सोही अवधिमा रु ४३ करोड १ लाख मुल्यका १ सय ६५ वटा मात्र विद्युतीय सवारी आयात भएका थिए ,जसबाट रु ३५ करोड ५० लाख राजस्व सङ्कलन भएको थियो ।
वीरगन्ज भन्सार कार्यालयका सुचना अधिकारी उदयसिंह विष्टका अनुसार विद्युतीय सवारीप्रति आकर्षण बढेसँगै आयातमा तीव्र वृद्धि देखिएको छ भने विद्युतीय मोटरसाइकलको आयात घटेको छ । चालु आवमा १ हजार १ सय २८ वटा मोटरसाइकल (रु ८० करोड ५७ लाख ) आयात हुँदा गत वर्ष सोही अवधिमा ३ हजार ३ सय ७४ वटा (रु ४४ करोड ३ लाख ) आयात भएका थिए ।
यसैगरी इन्धनबाट चल्ने सवारीसाधनको आयात पनि उल्लेख्य रहेको छ । चालु आवमा रु १ अर्ब १६ करोड १३ लाख मुल्यका ६ सय ९ वटा जिप, कार र भ्यान आयात भएका छन् जसबाट रु २ अर्ब ८६ करोड राजस्व उठेको बताइएको छ । अघिल्लो वर्ष भने रु १ अर्ब ५० करोड मुल्यका ७ सय ४८ वटा सवारी आयात हुँदा रु ३ अर्ब ७३ करोड राजस्व सङ्कलन भएको थियो ।
चालु आर्थिक वर्षको सात महिनामा सवारीसाधन तथा पार्टपुर्जाको आयात रु २३ अर्ब ५७ करोड पुगेको छ , जुन गत वर्षको सोही अवधिको रु १७ अर्ब १५ करोडको तुलनामा उल्लेख्य वृद्धि भएको जनाइएको छ ।
