इन्धनको मूल्यमा वृद्धि, डिजेल–मट्टितेल प्रतिलिटर ३० रुपैयाँले बढ्यो

काठमाडौं । सरकारले फेरि इन्धनको मूल्य वृद्धि गरेको छ। नेपाल आयल निगमका अनुसार आजदेखि लागू हुने गरी डिजेल, मट्टितेल र आन्तरिक हवाई इन्धनको मूल्य बढाइएको हो।

निगमले आज राति १२ बजेदेखि लागू हुने गरी नयाँ मूल्य समायोजन गरेको जनाएको छ। समायोजनअनुसार डिजेल र मट्टितेलको मूल्य प्रतिलिटर ३० रुपैयाँले बढाइएको छ भने आन्तरिक हवाई इन्धनमा प्रतिलिटर ५ रुपैयाँ वृद्धि गरिएको छ। पेट्रोलको मूल्य भने यथावत् राखिएको छ।

नयाँ मूल्यसूची अनुसार अब पहिलो वर्गका क्षेत्रमा डिजेल र मट्टितेलको खुद्रा बिक्री मूल्य प्रतिलिटर २३४ रुपैयाँ ५० पैसा पुगेको छ। त्यस्तै दोस्रो वर्गमा प्रतिलिटर २३६ रुपैयाँ र तेस्रो वर्गका क्षेत्रमा २३७ रुपैयाँ कायम गरिएको छ।

यसैगरी, आन्तरिकतर्फ हवाई इन्धनको मूल्य प्रतिलिटर २५१ रुपैयाँबाट बढेर २५६ रुपैयाँ पुगेको निगमले जनाएको छ। निगमले अन्तर्राष्ट्रिय बजारको मूल्यका आधारमा इन्धनको मूल्य समायोजन गरिएको बताएको छ।