काठमाडौं मेरियट होटलद्वारा ‘प्रिजनर्स असिस्टेन्स नेपाल’ लाई सिएसआर पहलमार्फत सहयोग

काठमाडौं । सामाजिक उत्तरदायित्व र मानवीय संवेदनालाई आत्मसात गर्दै एभरेस्ट हस्पिटालिटी एण्ड होटल लिमिटेड अन्तर्गत सञ्चालनमा रहेको काठमाडौं मेरियट होटलले काठमाडौंको साँखुस्थित ‘प्रिजनर्स असिस्टेन्स नेपाल’लाई नगद सहयोग तथा भोजन वितरण गरेको छ।

सहयोग हस्तान्तरण कार्यक्रम प्रिजनर्स असिस्टेन्स नेपालको परिसरमा सम्पन्न भएको थियो। कार्यक्रममा एभरेस्ट हस्पिटालिटी एण्ड होटल लिमिटेडका सञ्चालकले संस्थालाई एक लाख रुपैयाँ नगद सहयोग प्रदान गर्नुका साथै २०० बालबालिकाका लागि भोजनको व्यवस्था गरेका थिए। कार्यक्रममा होटलका प्रतिनिधि तथा संस्थाका कर्मचारीहरूको सहभागिता रहेको थियो। यस पहलले समाजबाट प्रायः ओझेलमा पर्ने समुदायप्रति आत्मीयता र ऐक्यबद्धताको भावना झल्काएको थियो।

‘प्रिजनर्स असिस्टेन्स नेपाल’ मुख्यतः कारागारमा रहेका अभिभावकका बालबालिकाको पूर्ण हेरचाहमा समर्पित संस्था हो। संस्थाले ती बालबालिकालाई आवश्यक सहयोग, माया र अवसर प्रदान गर्न निरन्तर काम गर्दै आएको छ। साथै, यो संस्था कारागारलाई बन्दीहरूले भविष्य निर्माण गर्न सक्ने सकारात्मक स्थानका रूपमा विकास गर्ने दिशामा पनि सक्रिय छ। यस्ता सहयोगहरूले बालबालिका र उनीहरूको परिवारमा सम्मान र आशाको भावना पुनर्स्थापित गर्न महत्त्वपूर्ण भूमिका खेल्ने विश्वास गरिएको छ। नगद सहयोगले संस्थाको सञ्चालन आवश्यकतामा सहयोग पुग्नेछ भने भोजन कार्यक्रमबाट संस्थामा आश्रित २०० बालबालिकाले प्रत्यक्ष लाभ पाउनेछन्।

यस अवसरमा काठमाडौं मेरियट होटलका प्रबन्ध निर्देशक गौरव अग्रवालले भने, “कुनै पनि बालबालिकाले आफ्नो नियन्त्रणभन्दा बाहिरको परिस्थितिका कारण पीडा भोग्न नपरोस्। यी बालबालिकाले जीवनमा धेरै कठिनाइ भोगिसकेका छन्, र उनीहरूलाई सम्मान, हेरचाह तथा राम्रो भविष्यको आशासहित हुर्कने वातावरण सुनिश्चित गर्नु हामी सबैको जिम्मेवारी हो।”

साँचो हस्पिटालिटी होटलको सीमाभित्र मात्र सीमित हुँदैन भन्नेमा काठमाडौं मेरियट होटल विश्वस्त छ। यसले शहरलाई जीवन्त बनाउने मानिस र समुदायप्रति जिम्मेवारी र संवेदनशीलता पनि समेटेको छ। यो सिएसआर पहल सोही विश्वास र समाजका सबैभन्दा संवेदनशील वर्गको जीवनमा सकारात्मक तथा दीर्घकालीन परिवर्तन ल्याउने होटलको निरन्तर प्रतिबद्धताको प्रतिबिम्ब रहेको बताइएको छ।

काठमाडौँ मेरियट होटल नेपालको अग्रणी लक्जरी हस्पिटालिटी गन्तव्य हो, जुन राजधानीको केन्द्रमा अवस्थित छ। मेरियट इन्टरनेसनलको विश्वव्यापी सञ्जाल अन्तर्गत रहेको यस होटलले अन्तर्राष्ट्रिय स्तरको सेवा र नेपालको संस्कृति, समुदाय तथा नागरिकप्रतिको प्रतिबद्धतालाई एकसाथ अघि बढाउँदै आएको जनाएको छ। सन् २०१९ देखि सञ्चालनमा आएको यो होटल स्वदेशी तथा विदेशी पर्यटक, व्यवसायिक पाहुना र स्थानीय साझेदारहरूको विश्वासिलो गन्तव्य बनेको बताइएको छ।