पश्चिमी न्यून चापीय रेखा र स्थानीय वायुको प्रभाव : आज यी प्रदेशमा वर्षाको सम्भावना

काठमाडौं । नेपालमा पश्चिमी न्यून चापीय रेखा, स्थानीय वायु र नेपाल नजिक रहेको न्यून चापीय रेखाको मिश्रित प्रभावका कारण आज देशभरकै मौसम प्रभावित भएको छ । यो मौसमी प्रणाली सक्रिय रहँदा देशका विभिन्न स्थानमा मेघगर्जन र चट्याङसहित हल्कादेखि मध्यम वर्षा तथा हिमपात भइरहेको छ ।

जल तथा मौसम पूर्वानुमान महाशाखाका अनुसार नेपालको उपल्लो वायुमण्डलमा रहेको मौसमी प्रणालीका कारण हाल कर्णाली, सुदूरपश्चिम, कोशी, बागमती, गण्डकी र लुम्बिनी प्रदेशका हिमाली तथा पहाडी भू-भागमा साधारणतया बदली भएको छ भने तराई क्षेत्रमा आंशिक बादल लागेको छ । अहिले कोशी, बागमती र कर्णाली प्रदेशका थोरै स्थानहरू तथा गण्डकी र सुदूरपश्चिम प्रदेशका एक-दुई स्थानमा मेघगर्जनसहित हल्कादेखि मध्यम वर्षा भइरहेको छ ।

आज देशभरकै मौसममा आंशिकदेखि साधारणतया बदलीको अवस्था रहने महाशाखाले जनाएको छ । तराई भू-भागमा आंशिक बदली भए पनि हिमाली र पहाडी क्षेत्रमा भने मौसम बिग्रने सम्भावना छ ।

विशेष गरी कर्णाली र सुदूरपश्चिम प्रदेश लगायत कोशी, बागमती र गण्डकी प्रदेशको हिमाली तथा पहाडी भू-भागका थोरै स्थानहरूमा मौसम प्रतिकूल रहने देखिएको छ । साथै, ती क्षेत्रहरूका अतिरिक्त कोशी र लुम्बिनी प्रदेशका तराई भू-भागका एक-दुई स्थानमा समेत मेघगर्जन, चट्याङ र हुरीबताससहित मध्यमसम्मको वर्षा र उच्च हिमाली क्षेत्रमा हिमपात हुनसक्ने पूर्वानुमान महाशाखाले गरेको छ । सम्भावित चट्याङ र मौसम फेरबदलबाट हुनसक्ने जोखिमप्रति सतर्क रहन मौसमविद्हरूले आग्रह गरेका छन् ।