काठमाडौं । जेएसडब्लू एमजी मोटर इन्डिया र नेपालका आधिकारिक वितरक जी.ओ. अटोमोबाइल्स प्रा.लि. (गोल्छा अर्गनाइजेशन) ले नेपालमा नयाँ विद्युतीय सवारी एमजी कम्युट ईभी सार्वजनिक गरेका छन्।
कम्पनीले यसलाई ‘स्वर्णिम अवसर’ को अवधारणासहित नेपाली बजारमा ल्याएको जनाएको छ । शुरुवाती मूल्य ३४ लाख ९९ हजार रुपैयाँ निर्धारण गरिएको यो १०० किलोवाट क्षमताको ठूलो क्रसओभर युटिलिटी भेइकल अर्थात सीयूभी परिवार, होटल, रिसोर्ट, ट्राभल सेवा तथा कर्पोरेट फ्लीटका लागि उपयुक्त हुने कम्पनीको दावी छ ।
जी.ओ. अटोमोबाइल्स प्रा.लि.का प्रबन्ध निर्देशक आकाश गोल्छा ले भने, “स्वर्णिम अवसर भनेको अहिलेको सन्दर्भमा नेपालका लागि कम्युट ईभी नै हो । बजेट संशोधनपछि यो अझ उपयुक्त विकल्प बनेको छ । यो कम मूल्यमा उपलब्ध शक्तिशाली र ठूलो गाडी हो, जसमा अनावश्यक सुविधा थपेर लागत बढाइएको छैन । आराम, पर्याप्त स्थान र समयलाई प्राथमिकता दिने ग्राहकका लागि यो उत्कृष्ट विकल्प हो ।”
उनका अनुसार गाडीमा पर्याप्त लगेज स्पेस र लेगरुम, आरामदायी सिट तथा सहज र किफायती स्पेयर पार्ट्स उपलब्ध गराइएको छ । एमजीको विद्युतीय प्लेटफर्ममा आधारित कम्युट ईभीले एकपटकको पूर्ण चार्जमा ३३२ किलोमिटरसम्म (एमआईडीसी प्रमाणित) यात्रा गर्न सक्ने कम्पनीले जनाएको छ । यसमा १०० किलोवाटको विद्युतीय मोटर जडान गरिएको बताइएको छ ।
सवारीको भित्री संरचना यात्रु केन्द्रित बनाइएको छ । यसमा १३५ डिग्रीसम्म झुकाउन मिल्ने सिट, बहु–यात्रु यात्रालाई सहज बनाउने फ्ल्याट लेआउट तथा ६०४ लिटर क्षमताको फराकिलो लगेज स्पेस उपलब्ध छ । कम्पनीका अनुसार यो सवारी व्यक्तिगत प्रयोगभन्दा बढी होटल ट्रान्सफर, विमानस्थल पिकअप तथा कर्मचारी आवतजावतलाई लक्षित गरी विकास गरिएको हो ।
नेपालको आतिथ्य तथा पर्यटन क्षेत्र विस्तार भइरहेका बेला कम खर्च र यात्रुको सहजतालाई ध्यानमा राखेर यस्तो सवारीको माग बढिरहेको कम्पनीको भनाइ छ । एमजी कम्युट ईभीले यात्रुका लागि आरामदायी अनुभव र व्यवसायीका लागि शान्त तथा शून्य उत्सर्जनयुक्त विकल्प प्रदान गर्ने कम्पनीको जनाएको छ ।
प्रत्येक एमजी कम्युट ईभीसँग ३.३ किलोवाटको पोर्टेबल चार्जिङ केबल स्ट्यान्डर्ड रूपमा उपलब्ध हुनेछ । साथै गाडीमा अल–डिस्क ब्रेक, इलेक्ट्रिक पार्किङ ब्रेक, अटो होल्ड, हिल डिसेन्ट कन्ट्रोल तथा स्पेयर टायरका लागि छुट्टै स्थान समेत समावेश गरिएको छ, जसले नेपालका विविध सडक तथा भौगोलिक अवस्थाका लागि यसलाई उपयुक्त बनाउने कम्पनीले जनाएको छ ।
कम्युट ईभी सार्वजनिकसँगै एमजी र जीओ अटोमोबाइल्सले व्यक्तिगत सवारीभन्दा बाहिर व्यवसायिक तथा संस्थागत विद्युतीय गतिशीलता क्षेत्रमा आफ्नो उपस्थिति थप विस्तार गरेको बताएका छन् ।
सन् १९३० मा स्थापना भएको प्रतिष्ठित गोल्छा अर्गनाइजेशन अन्तर्गत रहेको जी.ओ. अटोमोबाइल्स प्रा.लि. नेपालका अग्रणी अटोमोबाइल आयातकर्ता तथा वितरकमध्ये एक हो। कम्पनीले अन्तर्राष्ट्रिय ब्रान्डसँगको सहकार्य मार्फत नेपाली बजारमा परम्परागत प्रदर्शन र आधुनिक विद्युतीय गतिशीलता समाधान उपलब्ध गराउँदै आएको जनाएको छ ।
देशव्यापी सञ्जाल तथा बजार अनुभवका आधारमा कम्पनीले नेपालभर ग्राहकको गतिशीलता अनुभव सुधार गर्दै आएको बताइएको छ ।
सन् २०२३ मा विश्वव्यापी फर्चुन ५०० कम्पनी एसएआईसी मोटर र भारतको जेएसडब्लू समूहबीच संयुक्त सहकार्य मार्फत जेएसडब्लू एमजी मोटर इन्डिया स्थापना भएको हो। कम्पनीले स्मार्ट र दिगो अटोमोबाइल प्रणाली विकास गर्दै उत्कृष्ट प्रविधियुक्त सवारीसाधन सर्वसुलभ बनाउने लक्ष्य लिएको जनाएको छ ।
सन् १९२४ मा बेलायतमा स्थापना भएको मोरिस ग्यारेज (एमजी) खेलकुद कार, रोडस्टर तथा क्याब्रियोलेट श्रृंखलाका लागि विश्वभर परिचित रहेको ब्रान्ड हो । पछिल्लो एक शताब्दीमा एमजी आधुनिक, नवप्रवर्तनशील तथा भविष्य उन्मुख ब्रान्डका रूपमा विकसित भएको कम्पनीले बताएको छ ।
भारतको गुजरातस्थित हलोल उत्पादन केन्द्रबाट वार्षिक १ लाखभन्दा बढी सवारी उत्पादन हुँदै आएको छ । कम्पनीले कनेक्टेड, स्वचालित, साझा तथा विद्युतीय गतिशीलताको अवधारणालाई अघि बढाउँदै भारतीय बजारमा विभिन्न नयाँ प्रविधियुक्त मोडल सार्वजनिक गर्दै आएको जनाएको छ ।
