रबिन्द्र यादव / नवलपरासी पश्चिम २४ बैशाख नवलपरासी पश्चिम जिल्लाको प्रतापपुर गाउँपालिका वडा नं ८ पिपरपातीलाई स्मार्ट कृषिगाउँ बनाइने भएको छ । प्रदेश नं ५ सरकारले स्मार्ट कृषिगाउँ बनाउन चालू आर्थिक वर्षमा बजेटको व्यवस्था गरेपछि स्मार्ट कृषिगाउँमा पिपरपातीलाई छनोट गरिएको हो । स्मार्ट कृषिगाउँका लागि छनोटमा परेको पिपरपातीमा स्मार्ट पोट्री फार्म ( कुखुरा पालन ) सञ्चालन हुने बताइएको छ । प्रदेशको भूमि व्यवस्था, कृषि तथा सहकारी मन्त्रालयको एक निर्वाचन क्षेत्र एक स्मार्ट कृषिगाउँ अन्तर्गत यहाँ उक्त कार्यक्रम सञ्चालन गर्न लागिएको प्रदेशसभा सदस्य अजय बहादुर शाहीले बताउनु भएको छ ।
प्रदेश सरकारले त्यसका लागि रु ५० लाख बजेटसमेत विनियोजन गरिसकेको उनले बताए । स्थानीयसँगको साझेदारीमा पिपरपातीलाई स्मार्ट कृषि गाउँ बनाउने प्रक्रिया थालिएको हो । परम्परागत कृषि प्रणालीलाई छाडेर आधुनिक कृषि प्रणालीलाई उपयोग गर्ने गरी कार्यक्रमको अवधारणा अघि सारिएको प्रदेशसभा सदस्य शाहीले बताए । कार्यक्रममार्फत यहाँका धेरै भन्दा धेरै किसानलाई व्यावसायिक बनाउने लक्ष्य लिएको छ ।
कृषिमा व्यावसायीकरण र यान्त्रिकीकरण गर्नलाई कार्यक्रम सञ्चालन गरिएको बताइएको छ । कार्यक्रम सञ्चालनका लागि कार्य विधि बनाइएको शाहीले बताए । कार्यविधि अनुसार सरकारले गरेका लागानीमा किसान आफैँले पनि थप २० प्रतिशत लगानी गर्नुपर्ने व्यवस्था छ । कार्यविधिमा प्रदेश सरकारले बजेट तथा प्राविधिक खटाउने छ भने स्थानीयवासीले पनि योगदान गर्नुपर्ने छ । सरकारले कुखुरा पालनका लागि आफ्नो गाउँलाई स्मार्ट क्षेत्र बनाउन थालेपछि स्थानीयवासी खुशी भएका छन् । स्थानियहरुको दैनिकी परिवर्तन गर्न सरकारले सहयोग गर्न थालेको वडा अध्यक्ष कादिर अलि अन्सारीले बताउनु भयो ।
किसानहरुले परम्परागत शैलीमा गर्दै आएको पेशालाई आधुनिक र व्यवस्थित गर्न उक्त कार्यक्रमले किसानलाई ठूलो सहयोग पुग्ने उनको भनाइ थियोे । कुखुरा पालन बाट मासु तथा अण्डा ( फुल ) उत्पादन गरेर यहाँका किसानले आर्थिक उपार्जन गर्ने छन् । स्मार्ट कृषिगाउँ भएपछि बजारीकरणमा समेत सहयोग पुग्ने अन्सारीले बताए ।
पिपरपाती स्मार्ट कृषि गाउँ कार्यक्रम कार्यवन्यन समिति प्रतापपुर गाउँपालिका ८ पिपरपातीका संयोजक युवराज मौर्याका अनुसार भाडाको जग्गामा २ वटा खोर बनाएर, २ हजार कुखुरा राख्ने छ साथै त्यस भित्र स्टोर रुम, सुचना केन्द्र राखेने र बनाइने छ । उक्त समितिमा संयोजक र सचिव सहित ५१ सदस्यीय समिति रहेको छ । केही दिन भित्र खोर बनाएर अरु बाकी प्रक्रिया अगाडि बढाउने मौर्याले बताए ।
