जारी निषेधाज्ञा आज मध्यराति सकिँदै, अब के होला ?

काठमाडौं । काठमाडौं उपत्यकामा जारी निषेधाज्ञा आज आइतबार मध्यराति सकिँदैछ । पछिल्लो पटक थप गरिएको निषेधाज्ञाको अवधि सकिँनै लाग्दा नयाँ रणनीति तय गर्न आइतबार आज दिउँसो ३ बजे काठमाडौं, ललितपुर र भक्तपुरका प्रमुख जिल्ला अधिकारी (सिडिओ) को बैठक बस्दैछ ।

काठमाडौंमा वैशाख १६ बाट निषेधाज्ञा जारी छ । तर, पछिल्लो पटक पसल बार अनुसार सञ्चालनमा छन् भने सार्वजनिक र निजी सवारी साधन जोर बिजोर प्रणालीमा चलिरहेका छन् । भक्तपुरका प्रमुख जिल्ला अधिकारी प्रेमप्रसाद भट्टराईले बैठकका निर्णय साँझ ५ बजेसम्ममा सार्वजनिक गरिने बताए ।

हाल २५ भन्दा बढी सिटका सार्वजनिक यातायात सञ्चालनमा छन् । खाद्य पसल बिहान ६ बजेदेखि तथा अन्य पसल पनि बिहान ११ बजेदेखि साँझ ६ बजेसम्म खुला गरिएको छ । यी पसल व्यवसाय सञ्चालनमा थप सहज बनाएर निषेधाज्ञा थप्ने तयारी रहेको उनले बताए । बैंक तथा वित्तीय संस्थासँगै कार्यालयहरु यसअघि नै सञ्चालनमा आइसकेका छन् ।