खोडपेमा खानेपानीको अभाव, यस्तो छ अवस्था?

काठमाडौं । सुदूरपश्चिम प्रदेशको बैतडीस्थित पाटन नगरपालिका–८ खोडपेमा पाँच दिनदेखि खानेपानीको चरम अभाव भएको छ ।

सिद्धेश्वर खानेपानी योजनामा समस्या आएपछि खानेपानीको अभाव छाएको हो । खानेपानी योजनाका सचिव मोहन बिष्टले लिफ्टिङ प्रणालीबाट सञ्चालन हुँदै आएको भए पनि हाल त्यस क्षेत्रको विद्युत् लाइनमा खराबी आएसँगै खानेपानी अवरुद्ध भएको जनाए ।

यहाँका होटेल, कार्यालय तथा यात्रुहरुलाई पनि खानेपानीको अभावले क्षती पुगेको छ । समस्या समाधानको लागि पहल भइरहेको जनाउँदै पाटन नगरपालिका–८ का वडाध्यक्ष हरिश बिष्टले भने, ‘विद्युतीय समस्याका कारण खानेपानी बन्द भएको हो । कम भोल्टेजको विद्युत् प्रवाह भइरहेको हुनाले मोटरले काम गरेको छैन । विद्युत् वितरण केन्द्रलाई खबर गरेका छौँ, प्रविधिक टोली आएर मर्मत गरिरहेकाले छिट्टै समाधान हुन्छ ।’

पाटन नगरपालिकाको दमकलबाट खानेपानीको आपूर्ति भइरहेको अवस्था छ ।