भारतले चिनी निर्यात रोके पनि नेपाली बजारमा अभाव नहुने

काठमाडौं । भारत सरकारले चिनी निर्यातमा रोक लगाएसँगै नेपाली बजारमा पछिल्लो १५ दिनमै किलोको २० रुपैँयाले चिनीको मूल्य बढेको छ ।

जुन १ तारिखदेखि भारतले चिनी निर्यातमा रोक लगाएको थियो । प्रतिकिलो रु. ९० पर्ने चिनी भारतको प्रतिबन्धछि रु. ११० पुगेको छ । बिहीबार यही विषयमा वाणिज्य, आपूर्ति तथा उपभोक्ता संरक्षण विभागले चिनी उत्पादक सङ्घ, साल्टट्रेडिङ कर्पोरेशन तथा नेपाल खुद्रा व्यवसायी सङ्घका प्रतिनिधिसँग छलफल गरेको थियो ।

चिनीको मूल्यका विषयमा विभागका महानिर्देशक लीलाप्रसाद शर्माले चिनी उत्पादकको उत्पादन लागत बढ्दा चिनीको मूल्य बढेको भन्दै भारतीय प्रतिबन्धले मूल्यमा कुनै असर नगरेको बताए । त्यस्तै, चिनी उत्पादक सङ्घका उपाध्यक्ष राजकुमार अग्रवालले पछिल्लो समय पेट्रोलियम पदार्थको मूल्य बढेको असर ढुवानीमा परेको जनाइएको छ ।

सङ्घले उद्योगबाट प्रतिकिलो रु ९३.८३ मा चिनी बिक्री गर्ने गरेको जनाइएको छ ।

त्यस्तै, चिनी उत्पादक सङ्घले भारतले चिनी निर्यातमा प्रतिबन्ध लगाए पनि नेपाली बजारमा चिनीको अभाव नहुने जनाए । चिनी उद्योगी तथा व्यवसायीसँग पर्याप्त मात्रामा चिनी मौज्दात रहेको जानकारी दिइएको छ । चिनी उत्पादक सङ्घको तथ्याङ्कानुसार नेपालमा वार्षिक २ लाख ७५ हजार मेट्रिक टन चिनीको माग रहन्छ । जसमा आधा नेपालकै उत्पादनले पुग्दै आएको छ । नेपालमा १० चिनी उद्योगले चिनी उत्पादन गर्छ ।