५ देखि ११ वर्षसम्मका बालबालिकाका लागि खोप भित्रियो

काठमाडौं । ५ देखि ११ वर्षका बालबालिका लागि कोरोनाभाइरसविरुद्धको फाइजर खोप नेपाल भित्रिएको छ । उक्त फाइजर खोप करिब २४ लाख मात्रामा रहेको जनाइएको छ ।

स्वास्थ्य सेवा विभाग आपूर्ति शाखाका प्रमुख डा सुरेन्द्र चौरसियाले कोभ्याक्स सुविधामार्फत २३ लाख ९९ हजार ३०० मात्रा पेडियाट्रिक डोज खोप आइतबार आइपुगेको बताए । खोप हाल खोप अभियान भइरहेको २७ जिल्लामा पठाइनेछ ।

उक्त २७ जिल्लाका पहिलो मात्रा लगाउन छुटेका बालबालिकालाई पनि खोप दिइनेछ । खोप माइनस ७० डिग्री सम्मको तापक्रममा भण्डारण गर्नुपर्ने हुन्छ । सरकारले यसअघि ६ असारमा पनि २२ लाख मात्रा खोप भित्राएको थियो ।