भ्रमणमा आएका चिनियाँ नेताको पहिलो भेट नै प्रधानमन्त्री देउवासँग..

काठमाडौं । आइतबार नेपाल भ्रमणमा रहेका चिनियाँ कम्युनिस्ट पार्टी (सीपीसी) का विदेश विभाग प्रमुख लिउ जियानचाओले प्रधानमन्त्री शेरबहादुर देउवासँग भेट गरेको जनाइएको छ ।

आज बिहान मात्र आएका जियानचाओ चार दिने भ्रमणका लागि नेपाल आएका हुन् । यसै सिलसिलामा उनको पहिलो भेट नै प्रधानमन्त्री देउवासँग भएको छ । दुईबीच प्रधानमन्त्रीको सरकारी निवास बालुवाटारमाा भेटवार्ता भएको हो ।

चिनियाँ नेता जियानचाओले उक्त भेटपछि परराष्ट्रमन्त्री नारयण खड्कासँग भेटघाट गर्ने कार्यसूची रहेको छ । परराष्ट्रमन्त्री खड्काले जियानचाओको सम्मानमा होटल मेरियटमा रात्रीभोज आयोजना गरेका छन् । त्यस्तै, उनले जिम्मेवारी सम्हाले लगत्तै नेपाल भ्रमण गर्नु र यहाँको शीर्ष राजनीतिक नेतृत्वसँग संवाद गर्नुलाई चीनले नेपाललाई प्राथमिकता दिइएको रूपमा विश्लेषण गरिएको छ ।

उनले गत जुनमा सीपीसीको विदेश विभाग प्रमुखको जिम्मेवारी सम्हालेपछि आफ्नो पहिलो विदेश भ्रमण नेपालबाट सुरु गरेका हुन् । नेपाल आउनुअघि उनीले नेकपा एमाले अध्यक्ष केपी ओली, माओवादी केन्द्रका अध्यक्ष पुष्पकमल दाहाल प्रचण्ड र परराष्ट्रमन्त्री खड्काबीच भर्चुअल संवाद गरेका थिए । जियानचाओले यस भ्रमणमा राष्ट्रपति विद्यादेवी भण्डारी, एमाले अध्यक्ष ओली, माओवादी केन्द्रका अध्यक्ष प्रचण्ड, एकीकृत समाजवादीका अध्यक्ष माधव नेपाल र सम्मानित नेता झलनाथ खनालसँग भेट गर्ने कार्यक्रम रहेको छ ।