दिपल प्रस्तुत मिस युनिभर्स नेपाल २०२६ को काठमाडौंमा ग्रान्ड अडिसन सम्पन्न

काठमाडौं । दिपल प्रस्तुत मिस युनिभर्स नेपाल २०२६ को काठमाडौंमा ग्रान्ड अडिसन बिहिबारसफलतापूर्वक सम्पन्न भएको छ। देशव्यापी छनोट प्रक्रियामार्फत नेपालका विभिन्न क्षेत्रबाट आएका कुल ६५ जना प्रतिस्पर्धीले आफ्नो आत्मविश्वास, प्रतिभा र क्षमता प्रस्तुत गर्दै नेपालको प्रतिष्ठित सौन्दर्य प्रतियोगितामा सहभागी हुने अवसरका लागि प्रतिस्पर्धा गरेका छन्।

६५ प्रतिस्पर्धीमध्ये २५ जना अर्को चरणका लागि छनोट हुनेछन्। उक्त प्रतियोगिता ग्लोबल ग्ल्यामर भेन्चर प्रा.लि. द्वारा आयोजना गरिएको हो भने दिपल यस प्रतियोगिताको शीर्ष प्रायोजक रहेको छ।

यस वर्षको प्रतियोगिताको मूल नाराः ‘Perfect As You Are’ ले प्रतिस्पर्धीहरूलाई कुनै निश्चित सौन्दर्यको परिभाषामा आफूलाई सीमित नगरी आफ्नै मौलिक पहिचान र व्यक्तित्वलाई आत्मसात् गर्न प्रेरित गर्ने बताइएको छ । देशका विभिन्न स्थानबाट काठमाडौं आएका सहभागीहरूले बिहिबारनिर्णायक मण्डलसमक्ष आफ्नो आत्मविश्वास, व्यक्तित्व र प्रस्तुतिकरण क्षमता प्रदर्शन गरेका थिए।

यस अवसरमा बोल्दै दिपलका प्रबन्ध निर्देशक विवेक सिकारियाले भने, “दिपलमा हामी विलासितालाई केवल बाहिरी सुन्दरताका रूपमा हेर्दैनौँ। आफू जस्तो हुनुहुन्छ, त्यही रूपमा आत्मविश्वासका साथ अघि बढ्नु नै हाम्रो लागि वास्तविक सुन्दरता हो। ‘Perfect As You Are’ ले पनि यही सोचलाई प्रस्तुत गर्छ। मिस युनिभर्स नेपालसँगको हाम्रो साझेदारीमार्फत यो सन्देश अझ धेरै मानिससम्म पुर्‍याउन पाउँदा हामी खुसी र गर्वित छौँ।”

त्यसैगरी, मिस युनिभर्स नेपालकी राष्ट्रिय निर्देशक सङ्गीता पुरीले भनिन्, “मिस युनिभर्स नेपालको सबैभन्दा विशेष पक्ष भनेको यसले सहभागी युवतीहरूमा ल्याउने सकारात्मक परिवर्तन हो। यस मञ्चले उनीहरूलाई आफ्नो प्रतिभा देखाउने र आफ्ना विचार व्यक्त गर्ने अवसर दिन्छ। प्रतियोगितापछि पनि धेरै सहभागीहरूले विभिन्न क्षेत्रमा सफल करियर निर्माण गर्दै यही आत्मविश्वासलाई साथमा लिएर अघि बढिरहेका छन्। मेरो दृष्टिमा यही नै यस मञ्चको वास्तविक मूल्य हो।”

बिहिबारको काठमाडौं अडिसन सम्पन्न भएसँगै अब आयोजकहरूले आगामी केही दिन भित्र सहभागीहरूको मूल्याङ्कन गरी अर्को चरणका लागि अन्तिम छनोट प्रक्रिया अघि बढाउनेछन्।

प्रतियोगिता अगाडि बढ्दै जाँदा आफ्नो सहरको प्रतिनिधित्व गर्दै राष्ट्रिय उपाधिका लागि प्रतिस्पर्धा गर्ने अवसर कसले पाउँछन् भन्ने विषय सबैको चासोको केन्द्र बन्नेछ। अन्ततः विजेताले विश्वकै प्रतिष्ठित मिस युनिभर्स प्रतियोगितामा नेपालको प्रतिनिधित्व गर्नेछन्।