बैतडीमा क्याम्पस प्रमुखमाथि बलात्कारको आरोप

काठमाडौं । बैतडीको पुर्चौंडी बहुमुखी क्याम्पसका प्रमुख राजेन्द्रसिंह नेगीमाथि बलात्कारको आरोप लागेको हो ।

बैतडीका प्रहरी प्रवक्ता, प्रहरी निरीक्षक लोकराज जोशीले आरोप लागेका नेगीविरुद्ध जबर्जस्ती करणी मुद्दा दर्ता भएको जनाए । कैलालीकी एक महिलाले आफूमाथि जबर्जस्ती करणी गरेको भन्दै दिएको जाहेरीका आधारमा नेगीविरुद्ध इलाका प्रहरी कार्यालय पाटनमा जबर्जस्ती करणी मुद्दा दर्ता भएको छ ।

उक्त जाहेरीका आधारमा मुद्दा दर्ता भएपछि क्याम्पस प्रमुख नेगीलाई प्रहरीले पक्राउ गरेर अनुसन्धान गर्ने लागेको छ । कैलाली घर भई बैतडीको पुर्चौंडीमा ज्याला मजदुरी गर्दै आएकी सो महिलामाथि क्याम्पस प्रमुख नेगीले बलात्कार गरेको आरोप लागेको हो ।

नेगीले गत असार २० गते पानी माग्ने निहुँमा बलात्कार गरेको पीडित महिलाले जनाएकी छन् । बुधबार सो महिलाको स्वास्थ्य परीक्षण गरिएको र रिपोर्ट आउन बाँकी रहेको छ । यसैबीच, क्याम्पस प्रमुख नेगीले पदबाट राजीनामा समेत दिएको जनाइएको छ ।