आज श्रीलंकामा नयाँ राष्ट्रपतिका लागि उम्मेदवारी दर्ता

काठमाडौं । श्रीलंकाका राष्ट्रपति गोटाबाया राजापाक्षेले राजीनामा दिएपछि नयाँ मंगलबार संसदमा राष्ट्रपतिका लागि मनोनयन हुँदैछ ।

गत हप्ता आर्थिक संकट विरुद्धको भीषण प्रदर्शनपछि गोटाबाया देश छोडेर भागेका थिए । त्यसपछि, बुधबार सांसदहरूले नयाँ राष्ट्रपति चयनको लागि मतदान गर्ने निर्णय गरेका छन् । कार्यवाहक राष्ट्रपति रनिल विक्रमासिङ्घेलाई सत्तारुढ श्रीलंका पिपुल्स फ्रन्टको समर्थन रहेकोले उनी अरुभन्दा बलियो देखिएका छन् ।

ट्रेड युनियनहरूले भने रनिल विक्रमासिंघेको राजपाक्षे परिवारसँग घनिष्ट सम्बन्ध भएकाले उनको मनोनयनको विरोध गर्ने बताए । त्यस्तै, श्रीलंकाका प्रमुख विपक्षी नेता सजिथ प्रेमदासाले राष्ट्रपतिको उम्मेदवारीबाट आफ्नो नाम फिर्ता लिने बताएका छन् । केही दिनअघि मात्र उनले राष्ट्रपति पदमा उम्मेदवारी दिने बताएका थिए ।

यसैगरी, एसजेबी पार्टीका नेता सजिथ प्रेमदासालेले ट्विटमा लेखेका छन्, ‘देशको हितका लागि म राष्ट्रपति पदको उम्मेदवारी फिर्ता लिन्छु । हाम्रो गठबन्धन र हाम्रा सहयोगीहरूले सांसद दलास अलापेरुमालाई विजयी गराउन कडा मेहनत गर्नेछन् ।’