मंकीपक्सका बिरामी दिल्लीमा पनि..

काठमाडौं । भारतको राजधानी नयाँ दिल्लीमा थप एक व्यक्तिलाई मंकीपक्स देखिएको छ ।

नयाँ संख्यासँगै भारतमा कुल मंकीपक्सका बिरामीको संख्या चार पुगेको छ । भारतीय सञ्चारमाध्यमले दिल्लीमा भेटिएका मंकीपक्सका बिरामीको अन्तर्राष्ट्रिय ट्राभल हिस्ट्री नभएको जनाएको छ । यद्यपि बिरामी हुनअघि उनी भारतमै हिमाचल प्रदेश गएर आएका थिए ।

स्वास्थ्यकर्मीले दिल्लीमा देखिएको मंकीपक्सको यो पहिलो केस भएको जनाए । आइतबार पश्चिम दिल्लीका ३१ वर्षीय स्थायी बासिन्दामा उक्त संक्रमण पुष्टि भएको र दुई हप्तासम्म ज्वरो आएपछि ती व्यक्ति दुई दिनअघि लोक नायक हस्पतामा भर्ना भएका थिए ।

उनीलाई हाल आइसोलेसनमा छन् । यहीबीच, दिल्लीका मुख्यमन्त्री अरविन्द केजरीवालले आम नागरिकलाई नडराउन आग्रह गर्दै संक्रमणको अवस्था नियन्त्रित रहेको बताए । साथै, उनले संक्रमितका लागि छुट्टै आइसोलेसन वार्ड बनाएको पनि बताए । यसअघि, जुलाइ १४ मा भारतको केरलामा पहिलो मंकीपक्सका बिरामी पुष्टि भएका थिए । यूएईबाट भारत फर्किएपछि ३५ वर्षीय व्यक्तिमा मंकीपक्स पुष्टि भएको थियो ।

त्यसैगरी, जुलाइ १८ मा केरलामै दोस्रो संक्रमित भेटिए । दुबइबाट भारत फर्किएपछि उनमा पनि संक्रमण देखिएको जनाइएको छ ।

शुक्रबार यूएईबाट फर्किएका भारतीयमा पनि संक्रमण पुष्टि भएको थियो । विश्व स्वास्थ्य संगठनले शनिबार जनस्वास्थ्य आपतकाल घोषणा गरेको छ । विश्व स्वास्थ्य संगठनका अनुसार हालसम्म विश्वका ७५ देशमा १६ हजारभन्दा बढी मंकीपक्सका बिरामी पत्ता लागेका छन् ।