शर्मामाथि छानबिन गर्ने समितिको प्रतिवेदनले आज अन्तिम रुप लिने

काठमाडौं । आज पूर्व अर्थमन्त्री जनार्दन शर्मामाथि छानबिन गर्न गठित समितिले प्रतिवेदनलाई अन्तिम रुप दिने जनाइएको छ ।

समितिका सचिव सुरेन्द्र अर्यालले आज राति ११ बजेसम्म थपिएको ७ दिनको म्याद रहने हुँदा प्रतिवेदन आजै सकेर भोलि बुझाउने तयारी रहेको बताए । जसका लागि आज मध्याह्न साढे १२ बजे बैठक बसिने भनिएको छ । उनले बैठक बस्नुअघि पनि सर्वसम्मत प्रतिवेदन तयार गर्न सांसदहरुबीच अनौपचारिक छलफल हुने बताएका छन् ।

समितिले हिजो पनि ६ घण्टा लगातार बैठक बसेर प्रतिवेदन लेखन सुरु गरेको थियो र प्रतिवेदन सर्वसम्मत बनाउन औपचारिक र अनौपचारिकरुपमा छलफल भइरहेकाले जनाइएको छ । यस्तै, समितिले बुधबार नेपाल प्रहरीको फरेन्सिक ल्याबबाट प्राप्त रिपोर्ट हेरेर विज्ञको सुझाव लिइ प्रतिवेदन लेख्न थालेको हो । एक सातापछि काम सुरु गरेको २२ असारमा गठित समितिले तोकिएको दश दिनमा निष्कर्ष ननिकालेछि साउन ५ गते ७ दिन म्याद थपिएको थियो ।

तत्कालीन अर्थमन्त्री शर्माले आर्थिक वर्ष २०७९/८० को बजेट निर्माणका क्रममा जेठ १४ गतेको मध्य राति अर्थ मन्त्रालयमा दुई अनधिकृत व्यक्तिलाई प्रवेश गराएर करको दर हेरफेर गरेको आरोपमा राजीनामा दिएका थिए । सोही विषयमा छानबिन समिति बनाई काम भइरहेको छ ।