धनगढीमा सेवा बन्द गरी विद्युतीय रिक्सा चालक आन्दोलित

काठमाडौं । सुदूरपश्चिम प्रदेशको अस्थायी राजधानी धनगढीमा विद्युतीय रिक्साचालकहरु सेवा बन्द गरी आन्दोलन गरीरहेका छन् ।

यातायात व्यवस्था कार्यालयले विद्युतीय अटो रिक्साचालक अनुमती पत्रको आवेदन नखोल्ने तर ट्राफिक प्रहरीले भने लाइसेन्स नभएको भन्दै ५ सयदेखि १५ सय रुपैयाँ दैनिक जरिवाना काट्न थालेपछि रिक्साचालकहरु आन्दोलित भएका हुन् । चालकहरु धनगढी उपमहानगरपालिका कार्यालय परिसरदेखि एलएन चोकसम्म रिक्साहरु लाममा राखी विहानैदेखि प्रदर्शनमा छन् ।

विद्युतीय रिक्सा चालक संघका अध्यक्ष मिनराज जोशीले धनगढी उपमहानगरपालिकाले नगर क्षेत्रमा चल्ने विद्युतीय रिक्साको पहिचान गरेर व्यवस्थापन गर्नुपर्ने, लाइसेन्स वितरणको प्रक्रियामा जानुपर्ने माग राख्दै आन्दोलन गर्न परेको बताए ।

संघका अध्यक्ष जोशीले माग सम्बोधन नभए अनिश्चितकालीन आन्दोलनका कार्यक्रम ल्याउने समेत चेतावनी दिए । हाल धनगढी उपमहानगरपालिका कार्यालयमा उक्त मागबारे छलफल भइरहेको छ ।