वाणिज्य बैंकहरुको निक्षेप एक सातामा २८ अर्बले घट्यो

काठमाडौं। चालू आर्थिक वर्षको सुरुवातदेखि नै वाणिज्य बैंकहरुमा निक्षेप घट्दो क्रममा रहेको छ । चालू आवको पहिलो महिना अर्थात साउनको पहिलो हप्ता ६३ अर्बले घटेको निक्षेप दोस्रो हप्ता पनि २८ अर्ब रुपैयाँले घटेको हो । नेपाल बैंकर्स संघको तथ्यांक अनुसार साउन ६ गतेसम्म वाणिज्य बैंकहरुमा ४४ खर्ब ७८ अर्ब रुपैयाँ निक्षेप रहेको थियो ।

उक्त निक्षेप दोस्रो सातासम्म अर्थात साउन १३ गतेसम्म आइपुग्दा २८ अर्ब रुपैयाँले घटेर ४४ खर्ब ५० अर्ब रुपैयाँमा सिमित बनेको हो । यस अवधिमा वाणिज्य बैंकहरुको कर्जा प्रवाह पनि घटेको छ । साउन ६ गतेसम्म वाणिज्य बैंकहरुले ४१ खर्ब ६५ अर्ब रुपैयाँ कर्जा प्रवाह गरेका थिए ।उक्त कर्जा प्रवाह एक अर्ब रुपैयाँले घटेर साउन १३ गतेसम्म आइपुग्दा ४१ खर्ब ६४ अर्ब रुपैयाँमा सिमित बनेको बैंकर्स संघको तथ्यांकमा उल्लेख छ ।