काठमाडौँ । नेपाली कांग्रेसमा संस्थापन इतरको डा।शेखर कोइराला पक्षले पार्टी कार्यालयमा धर्ना दिने भएको छ । आगामी प्रतिनिधि सभा र प्रदेशसभा निर्वाचनका लागि पार्टीभित्र सम्माजनक सिटको माग गर्दै आएको कोइराला पक्षले नेतृत्वलाई दबाब दिने भएको हो ।
कांग्रेसको प्रतिनिधि सभातर्फको समानुपातिक बन्दसूचीमा असन्तुष्टि जनाउँदै आएको कोइराला पक्षले पार्टी कार्यालयमा भर्ना दिने भएको छ । ठमेलस्थित यात्री होटलमा आज बसेको कोइराला पक्षधर नेताहरुको बैठकले टिकट वितरणमा पार्टीभित्र सभापति शेरबहादुर देउवा पक्षले एकलौटी गर्न खोजेको भन्दै आन्दोलनको घोषणा गरेका हुन् ।
असोज १२ गतेदेखि १४ गतेसम्म पार्टी नेतृत्वलाई खबरदारी गर्न विभिन्न कार्यक्रम गर्ने निर्णय गरेको छ । पार्टीभित्र टिकटलगायतमा समान अवसर र दुःख गरेका कार्यकर्तालाई भूमिका तथा न्याय दिनुपर्ने माग असन्तुष्ट पक्षको छ ।
कांग्रेसले बुझाएको समानुपातिक उम्मेदवारको सूची संशोधन गरिनुपर्ने शेखर पक्षका नेताहरूको माग छ । समानुपातिक उम्मेदवार सूची बुझाउँदा शेखर–गगन पक्षलाई सभापति देउवा पक्षले ४० प्रतिशत नदिएको आरोप छ ।
छलफलमा नुवाकोट कांग्रेसका निवर्तमान सभापति जगदीश्वरनरसिंह केसी, केन्द्रीय सदस्य प्रतिमा गौतम, अजयबाबु शिवाकोटी, मधु आचार्य, प्रकाश स्नेही, गुरूराज घिमिरे, रामनाथ अधिकारी, भूपेन्द्रजंग शाही, जितनारायण श्रेष्ठ, राजेन्द्र बगजाईं लगायत सहभागि थिए ।
उनीहरूले चियापानका लागि भने शेखर कोइराला र कोइराला पक्षबाट जितेका पदाधिकारीलाई पनि बोलाउने निर्णय गरेका छन् ।
