ठूला दलको उम्मेदवार घोषणा नहुँदा स्वतन्त्रलाई झन् फाइदा, के असर पर्ला

काठमाडौं । सत्ता गठबन्धनले दशमीपछि कुनैपनि समयमा उम्मेदवारहरुको नाम घोषणा गर्ने रणनीति बनाएको छ । सम्भवतः २२ असोजको मध्यराति उम्मेदवारीको नामावली सार्वजनिक हुनसक्छ ।

गठबन्धनको उम्मेदवार कुरेको एमालेले पनि लगत्तै आफ्नो नामावली सार्वजनिक गर्नेछ । गठबन्धनले एमालेलाई अन्य दलसँग गठबन्धन र आफ्ना पक्षधरलाई तान्न समय नदिने गरी रणनीति बनाएको देखिन्छ । जसका कारण २३ असोजको विहानमात्र कतिपयको नाम सार्वजनिक हुनसक्छ ।

ठूला दलहरुले उम्मेदवार घोषणा नगर्दा आकांक्षीहरु अलमलमा छन् । उनीहरुले चुनावी तयारी बढाउन सकेका छैनन् । जसका कारण अब दलहरु संगठनकै भर पर्नुपर्ने हुन्छ ।

यसपटकको चुनावमा व्यक्तिगत प्रभाव र क्षमताको पनि महत्व बढ्न थालेको छ । जसका कारण स्वतन्त्र उम्मेदवारहरुको लहर चलेको छ । दलका उम्मेदवारहरुलाई यसकारण पनि चुनौती बढी देखिन्छ । चुनावी प्रतिष्पर्धा विगतमा जस्तो दलहरुलाई सजिलो छैन ।

शहरी क्षेत्रमा मात्र नभई अन्य क्षेत्रमा पनि स्वतन्त्र उम्मेदवारहरु चुनौती बनेका छन् । लहर विस्तारै बढ्दै गएकाले यसपटक चुनावमा सोचेभन्दा फरक परिणाम आउन सक्ने आँकलनहरु भइरहेका छन् ।