आजको मौसम : तराईमा हुस्सु, पहाडमा आंशिक बदली

काठमाडौं । पछिल्लो केही हप्ता यता नेपालमा उल्लेखनीय मौसमी प्रणाली छैन । जसका कारण वर्षा र हिमपात भएको छैन । आज बिहान तराई भू-भागको केही स्थानमा हुस्सुरकुहिरो लागेको छ । पहाडी भू-भागमा आंशिक बदली रही बाँकी भू-भागको मौसम सामान्यतया सफा रहेको छ ।

तराईका केही भू-भागमा बिहानीपख हुस्सुरकुहिरो लाग्ने र देशका अधिकांश भू-भागमा तापक्रम क्रमिक रूपमा घट्दै गएकाले चिसोबाट बच्न आवश्यक सावधानी अपनाउन जल तथा मौसम विज्ञान विभागले आग्रह गरेको छ ।

आज दिउँसो गण्डकी र लुम्बिनी प्रदेशका साथै प्रदेश १ र वाग्मती प्रदेशका पहाडी भू-भागमा आंशिक बदली रहने विभागले जनाएको छ । बाँकी भू-भागमा मौसम सामान्यतया सफा रहनेछ ।

विभागले आज राति लुम्बिनी प्रदेशका साथै प्रदेश-१, वाग्मती र गण्डकी प्रदेशका पहाडी भू-भागमा आंशिक बदली रहने जनाएको छ । बाँकी भू-भागमा मौसम सामान्यतया सफा रहनेछ ।