काठमाडौं । मलेसियाको सेरेम्बन शहरमा हथौडाले मुखै मुखमा हानेर दुई नेपाली सुरक्षा गार्डको हत्या अर्का एक नेपालीले नै गरेको भन्दै मृतक र अभियुक्तको पहिचान खुलाइएको छ । ती अभियुक्त नेपालीलाई अदालत समक्ष मलेसियन प्रहरीले पेश गरेको छ ।
समाचार अनुसार, हत्या गरिएका दुई सुरक्षा गार्डहरुमा ३५ वर्षीय मनोजकुमार चौधरी र ४६ वर्षीय कृष्णकुमार दमाई परियार रहेका छन् । उनीहरुलाई ओकल्याण्ड कमर्सियल सेन्टरको हाताभित्र स्थानीय प्रहरीले मृत अवस्थामा शव फेला पारेको थिए ।
प्रहरीले यी दुबैको हत्याको आरोपमा ३७ वर्षीय ठाकुरप्रसाद भण्डारीलाई पक्राउ गरेको छ । उनलाई घटना भएकै दिन घटनास्थलमै पक्राउ गरिएको थियो । प्रहरीले सार्वजानिक गरेको विवरण अनुसार हत्यामा प्रयोग भएको हथौडा पनि घटनास्थलमै बरामद गरिएको थियो ।
अभियुक्त भण्डारीलाई बुधबार अपरान्ह सेरेम्बन मेजिस्टट कोर्टमा पेश गरिएको थियो र मेजिष्टेट मोहमद इब्राहिम हेहम्मद घुलामको इजलासमा यो मुद्दाको सुनुवाई भइरहेको छ ।
अभियुक्त भण्डारीले के कारणले आफ्नै देशका दुई व्यक्तिको हत्या गरेका हुन् भन्ने कुरा खुलिसकेको छैन । तर, अदालत समक्ष उनी माथि हत्याको आरोप लगाउँदा उनले कुनै प्रतिवाद नगरेको र स्वीकार गरेको स्थानीय संचारमाध्यम द स्टारले लेखेको छ ।
घटना डिसेम्बर ३ तारिकको दिन विहान ९ बजेर ८ मिनेटदेखि ४ बजेर ४८ मिनेटको बीचमा भएको सो अखवारको समाचारमा जनाइएको छ । मृतकहरु दुबै जनाको नेपालको स्थायी ठेगानामा पनि स्पष्ट भइसकेको छैन । साभार स् डिसी नेपाल
