काठमाडौँ । बलात्कार आरोप लागेर पुर्पक्षका लागि थुनामा रहेका नेपाली राष्ट्रिय टिमका पूर्वकप्तान सन्दीप लामिछानेको पेशी बिहीबार हुँदैछ । उनलाई थुनामा पठाउने काठमाडौँ जिल्ला अदालतको आदेशविरुद्ध गरेको पुनरावेदनको पेशी आजलाई तोकिएको हो ।
यसअघि काठमाडौँ जिल्ला अदालतले सन्दीपलाई मुद्दा पुर्पक्षका लागि थुनामा पठाउने आदेश गरेको थियो। यसअघि भएको सुनुवाइमा उनलाई धरौटी वा साधारण तारेखमा छाड्न सन्दीपका वकिलहरूले आग्रह गरेका थिए।
तर अदालतले उनलाई पुर्पक्षका लागि थुनामा पठाएको थियो। सन्दीप अहिले केन्द्रीय कारागार सुन्धारामा रहेका छन्। सन्दीपले एक १७ वर्षीया किशोरीलाई बलात्कार गरेको आरोप लगेको छ। सन्दीपले भने उक्त आरोप अस्वीकार गर्दै आएका छन्।
सन्दीपका वकिलहरुले किशोरीले जन्म दर्ता सच्याउँदै प्रतिलिपि जन्म दर्ता बनाएर उमेर घटाउँदै नागरिकता बनाएकोको दावी गर्दै आएका छन्।
वकिलहरूले उनको वास्तविक जन्ममितिसमेत अदालतमा प्रस्तुत गर्ने बताएका छन्।
