एक युवतीले विवाह प्रस्ताव नमानेपछि प्रेमी र उनको आमामाथि छर्किन पेट्रोल

दाङ । दाङमा एक युवतीले आफ्नो विवाह प्रस्ताव नमानेको झोकमा आफ्ना प्रेमी र उनको आमालाई पेट्रोल छर्केर ज्यान लिन खोजेकी छन् । गम्भीर घटना भए पनि प्रहरीले दुवै पक्षलाई मिलापत्र गराएको छ ।

ती युवतीले प्रेमी र उनको आमालाई मात्र जलाउन खोजेको नभइ अन्त्यमा पेट्रोल छर्केर आफै आत्मदाह गर्ने प्रयास समेत गरेकी थिइन् । युवती घोराहीका विशाल अग्रवालसँग प्रेममा रहेकी थिइन् ।

ती युवती डिभोर्सी हुन् भन्ने थाहा पाएपछि विशालले उनीसँगको भेटघाट कम गरेका थिए । त्यसपछि गत जेठ १५ गते उनले विशाललाई विवाहको प्रस्ताव राखिन् । विशालले उनको प्रस्तावको कुनै जवाफ दिएनन् ।

त्यसपछि ती युवतीले घोराहीको बैंक रोडमा रहेको विशालको कपडा पसलमा पुगेर विशाल र उनकी आमालाई पेट्रोल छर्केर जलाउने प्रयास गरिन् । उनीहरू सामान्य घाइते भए ।

त्यसपछि उनी आफैंले समेत पेट्रोल छर्केर आत्मदाह गर्ने प्रयास गरेकी थिइन् । तर, यो घटनालाई जिल्ला प्रहरी कार्यालय दाङले मिलापत्र गरेर टुंगायो । घटनापछि विशाललाई प्रहरी चौकीमा लगिएको थियो ।

उनले युवतीविरुद्ध मुद्दा हाल्ने भएपछि अन्तिममा प्रहरीले घटना बारे कुनै अनुसन्धान गरेन । जिल्ला प्रहरी कार्यालय दाङले भने दुवै पक्षले जाहेरी नदिएपछि मुद्दा दर्ता नभइ यो घटना मिलापत्रमा सकिएको जनाएको छ ।