काठमाडौँ । साताको अन्तिम करोबार दिन बिहीबार नेप्से परिसूचक १२.६२ अंक घटेर बन्द भएको छ । बुधबार २५.३१ अंक बढेको नेप्से परिसूचक यस दिन घटेर बन्द भएको हो । यस दिन नेप्से परिसूचक ०.६० प्रतिशत घटेर २०८४.९३ विन्दुमा बन्द भएको छ ।

बुधबारको तुलनामा आज कारोबार रकम भने वृद्धि भएको छ । आज तीन अर्ब ३९ करोड रुपैयाँको सेयर कारोबार भएको छ । बुधबार तीन अर्ब १८ करोड रुपैयाँको सेयर कारोबार भएको थियो । यस दिन म्युचुअल फन्ड, ऋणपत्रलगायत २९६ धितोपत्रको ९३ लाख ८२ हजार ४४० कित्ता खरिद–बिक्री भएको छ । कारोबारमा आएका १३ मध्ये म्युचुअल फन्ड, वाणिज्य बैक र होटेल समूहको परिसूचक वृद्धि भएको छ भने बाँकी समूहको परिसूचक घटेको छ ।

म्युचुअल फन्ड समूहको परिसूचक ०.५५ प्रतिशतले वृद्धि भएको छ भने वाणिज्य बैंक समूहको परिसूचक ०.३१ प्रतिशत र होटेल तथा पर्यटन समूहको परिसूचक ०.१९ प्रतिशतले वृद्धि भएको छ । सर्वाधिक परिसूचक घट्नेमा फाइसनान्स समूह रहेको छ । यो समूहको परिसूचक २ प्रतिशतले घटेको छ ।

घटेको बजारमा लगानीकर्ता ऋणपत्र र म्युचुअलमा आकर्षित भएका छन् । यस दिन सर्वाधिक मूल्य बढ्नेमा ऋणपत्र र म्युचुअल फन्ड रहेका छन् । शिवम् सिमेन्टको आज सर्वाधिक मूल्यको सेयर कारोबार भएको छ । यस कम्पनीको २३ करोड ३७ लाख रुपैयाँको सेयर खरिद–बिक्री भएको छ ।