बालाजुमा बाबुबाट नाबालिग छोरी बलात्कृत

काठमाडौं । काठमाडौंको बोहराटारमा आफ्नै बुबाले नाबालिग छोरीलाई बलात्कार गरेको खुलेको छ । काठमाडौं महानगरपालिका १६ बोहराटारस्थित डेरा बस्ने दुई छोराछोरीका बाबुले बलात्कार गरेको भन्दै आमाले जाहेरी दिएकी हुन् ।

प्रहरीको अनुसन्धान सकेर मुद्दा अदालत पुगेको छ । जिल्ला सरकारी वकिल कार्यालयले हाडनाता करणीमा बाबुविरुद्ध जिल्ला अदालत काठमाडौंमा मुद्दा दायर गरेको छ ।

करिव ५ वर्ष पहिले श्रीमान श्रीमती छुट्टिएर बस्दै आएका थिए । तर दुई छोराछोरी भने बाबुसँगै बस्दै आएका थिए । जेठ २७ गते राति १५ वर्षीय छोरा साथीको घर गएको मौकामा रक्सी खाएर आएका बाबुले बलात्कार गरेको अभियोग पत्रमा उल्लेख छ ।

पीडित नाबालिगले भने यसअघि पनि आफूलाई बाबुले पटक पटक बलात्कार गरेको र यो कुरा कसैलाई नभन्न र भने ज्यान मार्ने धम्की दिएको बताएकी छन् ।