माधव नेपाल स्वदेश फिर्ता,सिआइबीले लेला त ललिता निवास प्रकरणमा बयान ?

काठमाडौं । नेकपा एकीकृत समाजवादीका अध्यक्ष माधव कुमार नेपाल स्वदेश फिर्ता भएका छन् ।

अध्यक्ष नेपाल युरोपका विभिन्न देशहरू स्विजरल्याण्ड, स्पेन क्रोएसिया र बेलायतका देशको भ्रमणका लागि गत साउन २२ गते त्यसतर्फ गएका थिए । प्रवासी नेपाली एकता मञ्च युरोपले आयोजना गर्ने कार्यक्रममा सहभागी भएर नेता नेपाल भदौ १ गते स्वदेश फर्कने कार्यतालिका रहेपनि उनी चार दिनअघि नै स्वदेश फर्किएका हुन् ।

ललिता निवास, सुन प्रकरण लगायतका घटनाक्रमहरु विकसित भएकाले स्वदेश फर्कन पार्टीकै नेताहरूले आग्रह गरेपछि पुर्वप्रधानमन्त्री समेत रहेका अध्यक्ष नेपाल भ्रमण छोट्याएर फर्किएको पार्टी नेताहरूले जनाएका छन् ।

नेपाल आफु प्रधानमन्त्री भएको बेलामा ललिता निवासको जग्गा व्यक्तिका नाममा सार्ने कार्यमा निर्णायक भूमिकामा देखिएपछि सर्वोच्च अदालतले उनी लगायत पूर्व प्रधानमन्त्री बाबुराम भट्टराईमाथि छानविन गर्न आदेश दिएको छ ।

साउन २१ गते सर्वोच्चका न्यायाधीशद्धय अनिलकुमार सिन्हा र कुमार चुडालको संयुक्त इजलासले पूर्व प्रधानमन्त्रीद्धय भट्टराई र नेपालमाथि छानबिन गर्न आदेश दिएको हो ।