सर्पको टोकाइबाट सुत्केरीसहित दुई महिलाको मृत्यु, शिशु गम्भीर

रुकुम पश्चिम । रुकुम पश्चिममा सर्पको टोकाइबाट सुत्केरीसहित दुई महिलाको मृत्यु भएको छ । जिल्लाको चौरजहारी नगरपालिका–१३ रातामाटाकी २२ वर्षीया सुत्केरी विनिता ओली विष्ट र जिल्लाको सानीभेरी गाउँपालिका–१ जगल गाउँकी ६१ वर्षीया गङ्गी पुनको मृत्यु भएको हो ।

सुत्केरी २२ वर्षीया विष्टलाई मंगलबार दिउँसो बारीमा गाई वस्तुलाई घाँस काट्ने क्रममा सर्पले टोकेको थियो । सोही राति विष्टले छोरीलाई जन्म दिएकी थिइन् । सुत्केरीको रक्तश्राव नरोकिएपछि उपचारका लागि चौरजहारी अस्पताल लगिएको थियो ।

सर्पको विष शरीरमा फैलिएको र रक्तश्रावका कारण उनको मृत्यु भएको हो । शिशुको अवस्था पनि गम्भीर रहेकाले रेफर गर्न लागिएको अस्पतालले जनाएको छ । शिशु जन्मने अवधि कात्तिक महिना भए पनि समय नपुग्दै शिशुको जन्म भएको हो ।

यस्तै गङ्गी पुनलाई भने सर्पले भदौ ४ गते नै टोकेको थियो । सर्पले टोकेपछि पुनलाई चौरजारी अस्पताल हुँदै प्रादेशिक अस्पताल सुर्खेत पुर्‍याइएको थियो । अस्पतालबाट गाउँमै उपचार गर्ने भनेर परिवारले घर ल्याएको चार दिनपछि पुनको घरमै मृत्यु भएको हो ।