महेन्द्रनगर (धनुषा) । जनकपुरधाम क्षेत्रमा पहिलो पटक जङ्गलको मज्जा दिने गरी ‘कल्चरल भिलेज’ सञ्चालनमा आएको छ ।
जनकपुरधामदेखि धनुषाधाम जाने बाटोमा मिथिलेश्वर मौवाहीस्थित‘कल्चरल भिलेज’ सञ्चालनमा आउने भएको हो । जनकपुरधामदेखि उत्तर पूर्व १२ किलोमिटरको दुरीमा रहेको मिथिला विहारी नगरपालिका–२ पुरनदहास्थित सो भिलेज रहेकोे छ ।
जनकपुर–धनुषाधाम सडकखण्डस्थित पक्की सडकमै मिथिलेश्वर चोकदेखि पश्चिम रिसोर्ट खालको कल्चरल भिलेज सञ्चालनमा ल्याइएको सञ्चालक देवनारायण मण्डलले बताए । ‘जहाँ अतित वर्तमानसँग मिल्छ’ नारासहित सहरमा बसोबास गर्ने व्यक्तिको पुनर्ताजगीका लागि सो कल्चरल भिलेज उत्तम स्थान हुने सञ्चालक मण्डलले बताए ।
उनले भने, “सहरमा बसोबास गर्ने परिवारले गाउँ तर्फ आउँदा, धार्मिकस्थल घुमघामका लागि आउँदा पुरानो रीतिरिवाज, परम्परा पुरानो स्वाद र ब्यञ्जनको मज्जा यसमै लिन सकिन्छ ।” कल्चरल भिलेजमा ठूला पोखरी, रिसोर्ट, बागवानी, तरकारी, सभाहल, बगैँचासहित राति बास बस्नका लागि फुसकै घरमा उत्तम सुविधा पाइने उनले बताए ।
कल्चरल भिलेजमा जाने अतिथिका लागि पोखरीमा आफैँ बल्छीले माछा मारेर आफैँ बनाउन सकिने, ‘क्याम्प फायर’ बालेर पार्टी गर्न सकिने, शाकाहारी र मांसाहारीका लागि अलग–अलग क्याम्पको व्यवस्था गरिएको सञ्चालक मण्डलले बताए ।
यससँगै राति बास बस्ने अतिथिको आग्रहमा झिझिया नाच, झरीलगायतका नाचगान पनि देखाइने मण्डलले बताए । मण्डलका अनुसार कम्तीमा १० जना अतिथि भए नाचगानको व्यवस्था गरिनेछ । त्यसका लागि चारैतर्फ बत्ती जडान गरी नाचगानको बेग्लै स्थल पनि बनाइएको हो ।
बिचमा नाचगान हुने तथा चारैतर्फ अतिथि बसेर सांस्कृतिक कार्यक्रमको आनन्द लिन सकिने बताइएको छ । कल्चरल भिलेजमा जाने अतिथिका लागि रिसोर्टभित्रै लगाइएको जैविक खेतीको तरकारी, दाल र अन्य परिकार खान पाउने सञ्चालक मण्डलले बताए । शाकाहारीका लागि दाल, भात, अचार, पापड, तिलौरी, तिसौरी, बिरियाको तरकारी, कुम्हरौरीको तरकारी, अदौरीको तरकारी, पुदिनाको अचार, धनियाँको चटनीसहित अतिथिको मागका आधारमा खाना तयार गरिने सञ्चालक मण्डलले बताए ।
मांसाहारी अतिथिका लागि भने बेग्लै व्यवस्था गरिएको छ । मण्डलका अनुसार कल्चरल भिलेजभित्रै सम्पूर्ण सामान पनि पाइने भएकाले अतिथिले आफैँ कुनै परिकार बनाउन चाहेमा बनाउन सकिने उनले बताए । त्यसबापत अतिथिले सामानको मात्र शुल्क तिर्नुपर्ने छ ।
कल्चरल भिलेजभित्रै झुला, पिङ, म्युजियम पनि सजाउन लागिएको जनाइएको छ । कल्चरल भिलेजमा चिया, कफी, छनकाका लागि माटोका भाँडा प्रयोग हुने उनले बताए । सञ्चालक मण्डलले भने, “शीतल जल भनिने घैँटाको पानी अतिथिले रुचाएअनुसार खान सकिने छ ।”
उनले बाहिरबाट आउने अतिथिका लागि बैलगाडामा गाउँ घुमाउने रोचक हुने बताए । मण्डलका अनुसार खास व्यावसायिक व्यक्ति र परिवारका लागि उक्त स्थान उत्तम हुने छ । भित्रै सञ्चालन गरिएको रेष्टुरेन्टमा आफूखुसी परिकार पाइने जनाइएको छ ।
नयाँ वर्ष २०२४ का लागि तयारी सुरु
अङ्ग्रेजी नयाँ वर्ष २०२४ का लागि काम धमाधम सुरु भएको छ । सञ्चालक मण्डलले बाहिरबाट पिकनिक मनाउन आउने अतिथिका लागि पोखरीको डिल, खेत, गोहिया पनि उपलब्ध गराइने बताए ।
पिकनिक मनाउनका लागि अन्य विभिन्न स्थानमा जानुभन्दा यसभित्रै जङ्गलको आनन्द लिन सकिने र अतिथि राति बास बसेमा बिहानै विभिन्न चराचुरुङ्गी पनि देखाउने व्यवस्था मिलाइएको उनले बताए । कल्चरल भिलेजभित्रै केरा, अम्बा, अङ्गुर, आँप, ड्रागन फ्रुट लगायतका फलफूल लगाएकाले ताजा फलको पनि स्वाद लिन सकिने उनले बताए।
सञ्चालक मण्डलका अनुसार जनकपुर घुम्न आउने पर्यटक र जनकपुरबाट धनुषाधाम घुम्न जाने पर्यटकले कल्चरल भिलेजभित्रै अनेकौँ स्वाद चाख्न पाउने छन् ।
