टुडिखेलमा हुने माघी महोत्सवका लागि स्टल बुकिङ खुल्ला

काठमाडौँ । काठमाडौँको टुँडिखेलमा थारू राष्ट्रिय माघी महोत्सवको लागि स्टल बुकिङ खुल्ला भएको छ । पुस २९ र माघ १ गते हुने माघी महोत्सवका लागि स्टल खुल्ला भएको माघी महोत्सवका स्टल संयोजक चन्द्रप्रकाश चौधरीले बताए ।

उनका अनुसार महोत्सवमा स्टल राख्नका लागि हालसम्म ४० वटा बुक भइसकेको छ भने थप स्टलहरू पुस २७ गतेसम्म बुकिङका लागि खुल्ला रहनेछ ।

महोत्सवमा थारु खानपिन, हस्तकला, पुस्तक प्रर्दशनीका करिब एक सयवटा स्टलहरु रहने उनले जानकारी दिए । जसमा थारु जातिले माघी पर्वमा खाने विशेष खाना परिकार ढिक्री, अन्डिक भात, खिचरी, तिलको लड्डु, लाईमुरही, भुजा, अन्डी जाँडको झोल, दारु, केराको तरुवा, सखरखण्ड, खरिया, सुँगुर÷बंगुरको मासु, परेवाको मासु, माछा, घोघी, गंगटो, सिधरा (मसुलार), आलू सिन्की, बयरको चटनी, बरिया, चामलको गुरी, काथ्या रोटी, अन्डीक रोटी, तेलपौर रोटी, झझ्रा रोटी लगायतका परिकार पाइनेछ।

थारुहरुको मातृसंस्था थारु कल्याणकारिणी सभाले अगुवाइ गरेर काठामाडौंमा विगत २० वर्षदेखि माघी पर्वलाई महोत्सवको रुपमा मनाउँदै आएको छ । जसमा थारू विद्यार्थी समाज, थारू महिला समाज, थारू पत्रकार संघ, थारू सांस्कृतिक संघलगायतका २० बढी सामाजिक संस्थाहरूले संयुक्त रुपमा साथ दिँदै आएको छ ।