शोएब मलिकलाई शुभकामना दिँदै सानियाले भनिन्- ‘गोपनीयतामा ध्यान दिनुहोस्’

एजेन्सी । सानिया मिर्जाको परिवारले आइतबार भारतीय टेनिस स्टार र शोएब मलिकको सम्बन्धविच्छेद भएको पुष्टि गरेको छ । शोएब मलिकले एक दिनअघि पाकिस्तानी अभिनेत्री सना जावेदसँग विवाहको घोषणा गरेका थिए ।

सानियाको परिवारले जारी गरेको विज्ञप्तिमा भनिएको छ, ‘सानियाले आफ्नो व्यक्तिगत जीवनलाई सधैँ जनताको नजरबाट टाढा राखेकी छिन् । तर, आज उनको र शोएबको केहि महिनाअघि डिभोर्स भएको कुरा बताउन आवश्यक भएको छ । उनले शोएबलाई उनको नयाँ यात्राको लागि शुभकामना दिएकी छन्।’

विज्ञप्तिमा भनिएको छ, ‘उहाँको जीवनको यस संवेदनशील अवधिमा हामी सबै प्रशंसक र शुभचिन्तकहरूलाई कुनै पनि प्रकारको अड्कलबाजीमा नलाग्न र गोपनीयताको लागि उहाँको आवश्यकतालाई सम्मान गर्न अनुरोध गर्न चाहन्छौं ।’

४१ वर्षीय शोएब मलिकले शनिबार सानासँगको आफ्नो विवाहको तस्विर सामाजिक सञ्जालमा पोस्ट गरेका थिए । सामाजिक सञ्जाल ‘X’  मा आफ्नी नयाँ पत्नीसँगको तस्बिर पोस्ट गर्दै शोएबले लेखेका छन्, ‘हामीले तिमीलाई जोडी बनाएका छौं ।’

सानिया र शोएबले अप्रिल २०१० मा हैदरावादमा विवाह गरेका थिए र दुवै दुबईमा बस्थे । सानिया र शोएबको यो ‘हाइ प्रोफाइल’ जोडीलाई लिएर दुवै देशका खेल प्रेमीहरु बीच निकै चासो थियो तर उनीहरुको सम्बन्धविच्छेदसँगै यसको अन्त्य भएको छ ।

सन् २०२२ देखि उनीहरुको सम्बन्धमा दरार आएको खबर आएको थियो र पछिल्ला दुई वर्षमा उनीहरु दुबैसँगै देखिएका थिएनन् । केहि समयअघि शोएबले सानियालाई इन्स्टाग्राममा अनफलो गरेका थिए । शोएब र सानियाको पाँच वर्षको छोरा पनि छ, जो सानियासँगै बस्छन् ।

३७ वर्षीया सानियाको सामाजिक सञ्जाल पोस्टले पनि उनी तनावमा रहेको संकेत गरेको छ । करिब एक साताअघि उनले इन्स्टाग्राममा पोस्ट गरेकी थिइन्, ‘जब कुनै कुराले तपाईको शान्तिमा बाधा पुग्छ, त्यसलाई जान दिनुहोस् ।’