१९ वर्षीया युवतीको हत्या, घाँटी र हातका औलाहरू पनि काटिएका छन्

तानसेन। पाल्पामा एक युवतीको घाँटी रेटेर हत्या भएको छ । पाल्पाको रिब्दीकोट गाउँपालिका १ ख्याहामा बीभत्स तरिकाले हत्या भएको अवस्थामा युवतीको शव भेटिएको हो ।

मंगलबार दिउँसो घरनजिकै पँधेरोमा नुहाउन गएकी ती युवतीको धारीलो हतियारले शरीरका विभिन्न स्थानमा प्रहार गरेर हत्या गरेको अवस्थामा भेटिएको थियो । १९ वर्षीया पद्मा ख्याहा दलबहादुर र कमला सुनारकी छोरी हुन् । उनी शारदा माध्यमिक विद्यालयमा कक्षा १२ मा अध्ययनरत थिइन्।

मंगलबार दिउँसो करिब ४ बजे घर नजिकै रहेको पँधेरामा नुहाउन गएकी उनी अबेर साँझसम्म नफर्किएपछि खोजी गर्ने क्रममा हत्या गरिएको अवस्थामा शव भेटिएको थियो ।

उनको घाँटी र हातका औलाहरू काटिएका थिए भने घटनास्थलको प्रकृती हेर्दा जबरजस्ती गर्न खोज्दा बच्ने प्रयत्न गरेपछि हत्या भएको जस्तो देखिएको बताइएको छ । प्रहरीका अनुसार अनुसन्धानको लागी भैरहवाबाट कुकुर घटनास्थल पुगिसकेको छ । चाँडै घटना बारे वास्तविकता पत्ता लाग्ने जनाइएको छ ।