काठमाडौं । तिलोत्तमा नगरपालिका-६ सालघारी बस्ने ५५ वर्षीय सन्तु पुनको बाख्रा फर्ममा विद्युत सर्ट भई आइतबार दिउँसो आगलागी हुँदा करिब १२ लाख रूपैयाँ बराबरको धनमाल जलेर नष्ट भएको नेपाल प्रहरीले बताएको छ । प्रहरीका अनुसार भोटेकोशी गाउँपालिका-४ फुल्पिङ डाँडागाउ बस्ने ७० वर्षीय कुमार पौडेलको कच्ची घरमा विद्युत सर्ट भई आइतबार दिउँसो आगलागी हुँदा अन्नपात, लत्ताकपडा, भाडावर्तन, २ तोला सुन र महत्वपूर्ण कागजात पूर्णरुपमा जलेर करिब १५ लाख रूपैयाँ बराबरको धनमाल नष्ट भएको छ ।
यसैगरी आठविसकोट नगरपालिका-१० घरीखोला बस्ने प्रेमराज वलीको घरमा आइतबार दिउँसो लागेको आगो फैलिएर सोही ठाउँ बस्ने बिष्णु कुमार वलीको घरमा समेत आगलागी हुँदा दुबै जनाको घर भित्र रहेको अन्नपात, लत्ताकपडा, भाडाबर्तन र पूर्णरूपमा जलेर करिब ५ लाख रूपैयाँ बराबरको धनामल नष्ट भएको नेपाल प्रहरीले जनाएको छ।
प्रहरीका अनुसार खजुरा गाउँपालिका-७ स्थित शुशिल कोईराला प्रखर क्यान्सर अस्पतालको एक्सरे, सिटी स्क्यान रहेको कोठामा विद्युत सर्ट भई आइतबार साँझ आगलागी भएको छ । क्षतिको विवरण हाल खुलेको छैन । त्यस्तै गरेर माधवनारायण नगरपालिका-१ दिपहिटोल बस्ने सियाराम महतोको घरमा आइतबार दिउँसो लागेको आगो सल्किएर सोही ठाउँ बस्ने अन्य ५ जना मानिसहरुको घरमा समेत आगलागी हुँदा करिब १० लाख ७० हजार रूपैयाँ बराबरको धनमाल नष्ट भएको नेपाल प्रहरीले बताएको छ ।
प्रहरीका अनुसार मिक्लाजुङ गाउँपालिका-४ खेसाङखोपाङ बस्ने याम बहादुर राईको घरमा आइतबार राति आगलागी हुँदा २ तले घर र गोठ पूर्णरुपमा जलेर करिब ३५ लाख रूपैयाँ बराबरको धनमाल नष्ट भएको छ । प्रहरीले स्थानीय बासिन्दा र दमकलको सहयोगमा आगलागी नियन्त्रणमा लिनुको साथै यस सम्बन्धमा आवश्यक अनुसन्धान गरिरहेको बताइएको छ ।
