देशभरको मौसममा बदली, पश्चिम नेपालका केही जिल्लामा वर्षा

काठमाडौ उपत्यकालगायत देशभरको मौसममा बदली आउँदा अत्यधिक चिसो बढेको छ । गएराती पहिलो हिउँदे बर्षा भएपछि चिसो बढेको हो । आज दिउँसो मौसम बदली भई पानी पर्न सक्ने मौसम विज्ञान विभागले जनाएको छ । हिमाली क्षेत्रमा हिमपात भइरहेको छ । मौसम पूर्वानुमान महाशाखाका अनुसार पश्चिमी वायुको प्रभाव तथा न्यून चापीय रेखाको प्रभावको कारणले देशभरिकै मौसममा बदली आएको हो । पछिल्लो बदलीसँगै मुलुकभर नै हल्का वर्षा हुन सक्नेछ । उच्च हिमाली क्षेत्र र तथा उच्च पहाडी क्षेत्रका केही ठाउँमा हिजोदेखि हिमपात भएको छ भने आज पनि वर्षा तथा हिमपात हुने विभागले जनाएको छ ।

मौसमविद् शान्ति कँडेलकाअनुसार काठमाडौँलगायत पश्चिमी क्षेत्रमा बुधबार पनि मौसम बदली हुनेछ । मुस्ताङ, मनाङ, जोमसोम, रसुवा, धादिङ, रसुवा, सिन्धुपाल्चोक, सुदूरुपश्चिमका पाहाडी जिल्लाको उच्च क्षेत्रमा हिमपात भएको छ ।  विभागका अनुसार मुलुकभरको मौसम बिहीबारबाट मात्रै क्रमिक सुधार आउनेछ । पश्चिम नेपालका विभिन्न जिल्लामा अहिले वर्षा भइरहेका छन् । काठमाडौं उपत्यकामा पनि गएराती हल्का वर्षा भए पनि आज भने बिहानैदेखि घाम लागेको छ ।
पश्चिमी वायुको चापक्रमशःपूर्वतिर सर्दै जाँदा भने काठमाडौँलगायतका स्थानमा मौसम सामान्य बन्ने मौसमविद् कँडेलले बताउनुभयो । उहाँका अनुसार आज दिउँसो मुलुकका केही स्थानमा हल्का वर्षा हुनेछ । आज र भोलि पनि मौसम बदली हुने भएकाले विभिन्न ठाउँमा हवाई उडानमा समेत समस्या हुन सक्ने जनाइएको छ ।

कर्णालीमा भारी हिमपात , जनजिबन कष्टकर
जुम्लालगायतका उच्च हिमाली जिल्लाहरुमा हिजो दिउँसोदेखि भारी हिमपात भैरहेको छ । पश्चिमी वायुको कारण भएको भारी हिमापत आज बिहानसम्म उच्च भागमा करीब दुइ फिट र सदरमुकाम आसपासमा एक फिट जति हिउ परेको छ । हिमपातले अत्यधिक चिसो बढेपछि बालबालिका र बृद्धबृद्धा बढि समस्यामा परेका छन् । जुम्ला सहित उच्च हिमालि जिल्लामा अझै एक दुइ दिन हिमपात हुने मौसम पूर्वअनुमान महाशाखाले जनाएको छ । यसैबिच जुम्लामा भारी हिमपात भैरहेकाले पाटन तिर भेडा, बाख्रा राखेर बसेका किसानलाई सुरक्षित हुन प्रमुख जिल्ला अधिकारी दिपेन्द्रराज पौडेलले आग्रह गनुृ भएको छ । पाटनमा रहेका किसानहरुलाई आफ्नो घरपरिवारसँग यस्तो अवस्थामा नियमित सम्पर्क गर्न समेत उहाँले अनुरोध गर्नुभएको छ । पाटन तिर रहेका किसानहरुले हिउँको बाटो काट्दा ध्यान दिन समेत आग्रह गरीएको छ । मंगलबार दिउँसोबाट हिमपात शुरु भएपछि जुम्ला, मुगु, हुम्ला, डोल्पा, कालिकोट लगायत हिमालि जिल्लाका सर्बसाधारणको दैनिकी कष्टकर भएको छ । हिमपातले कामकाज तथा हिँडडुल गर्न अप्ठ्यारो परेपनि यतिखेरको हिँउले किसानलाई भने ठूलो फाइदा पुग्ने जिल्ला कृषि विकास कार्यालय जुम्लाका वरिष्ठ कृषि विकास अधिकृत विष्णुवहादुर महतले बताउनु भयो । यतिबेला परेको हिउँले गहुँ, जौ लगायतका अन्नबाली तथा स्याउ, ओखर लगायतका फलफूललाई राम्रो गर्ने जिल्ला कृषि विकास कार्यालय जुम्लाले जनाएको छ ।

हुम्लामा पनि हिमपानले अत्याधिक चिसो
लामो खडेरीपछि दोस्रो पटक हुम्लामा हिमपात भएपछि अत्याधिक चिसो बढेको छ । यसले जिल्लाको जनजीवन कष्टकर बन्दै गएको छ । हिजो बेलुका ८ बजेदेखि पर्न शुरु गरेको हिमपातले अहिले सिमकोटमा २ इन्च मात्र हिउँ जमेको भएपनि जिल्लाको तापक्रम माइनस ११ पुगेपछि जनजीवन निकै कष्टकर बन्दै गएका छ । लामो समयको चर्को खडेरीले दोस्रो पटक पर्न थालेको हिमपातले कृषकमा केही आशा जगाए पनि चिसोले जनजीवन भने निकै प्रभावित भएको छ । जल तथा मौसम विभागले केही दिनसम्म हुम्लालगायतका उच्च हिमाली जिल्लामा हिमपात हुन सक्ने जनाएको छ । लामो खडेरीका बिच केही दिन यता बंगालको मनसुन सक्रिय भएका कारण केही दिन हिमपात हुन सक्ने मौसमविद् शान्ति कँडेलले जानकारी दिनुभयो ।

मुगुमा चिसोका कारण जनजीवन प्रभावित
मुगुमा चिसोका कारण जनजीवन प्रभावित भएको छ.। आज हिजो बिहानैदेखी मुुगुमा चिसो बढेको हो । बिहानैबाट चिसो बढेपछि मुगु सदरमुकाम गमगढीमा मानिसहरुको आवतजावतसमेत न्युन रहेको छ । जिल्लाका रारा, मुर्माटप बामा लगायतका माथिल्ला भेगहरुमा केही समय अगाडी केही मात्रामा हिमपात समेत भएको थियो । चिसो बढेको बेलामा बालबालिका बृद्धबृद्धा र सुत्केरीको स्वास्थ्यमा ख्याल राख्न जिल्ला स्वास्थ्य कार्यालय मुगुले आग्रह गरेको छ । मुगुका गाउँमा ठन्डीसँगै फैलिएको मौसमी रुघाखोकीले दुई सातायता १२ जनाको मृत्यु भइसकेको छ ।